Өткеннің өнегесін ескермей, ертеңгі күнге елеулі қызмет ету мүмкін емес

Алдыңғы буын аға-әпкелерімізді ардақтау, лайықты құрмет көрсету – бүгінгі буынның мерейлі міндеттерінің бірі.

Осы тұрғыда Халықаралық әйелдер күні мерекесіне орай тоқсан жасқа қадам басқан ардақты ана, қазыналы қария Ғайникен Бибатыровамен кездесіп, құтықтадым.

Ғайникен Айдарханқызы – Жамбыл облысының Құрметті азаматы. Ұзақ жылдар бойы түрлі жетекшілік қызметтерде болған әпкеміз комсомол, партияда және мәдениет, білім, ғылым салаларында елеулі еңбек етті. Өз кезегінде Жамбыл облыстық партия комитетінің хатшысы (1973-1986 ж.ж.) ретінде Әулиеата өңірінің дамуына да сүбелі үлес қоса білді. Оның басшылығымен сол кездері көркемөнер галереясы, облыстық балалар кітапханасы ашылып, «Шу еркесі»,  «Меркі әуендері»,  «Талас толқындары», «Мойынқұм», «Фроиндшафт», «Сұлутөр», «Шолпан» атты  көркемөнерпаздар үйірмелері құрылды.

Кездесу барысында Ғайникен әпке өзінің өмірлік тәжірибесімен бөлісіп, әсерлі сәттері туралы әңгімеледі.

Ғұмыры ғибратқа толы Ғайникен Айдарханқызын көктем мерекесімен құттықтап, көп жылғы жемісті еңбегіне, адамгершілік, іскерлік қасиеттеріне деген зор құрметімді білдірдім.

• 07.03.2024
• 186