Павлодар облысында шыбын-шіркеймен күрес жұмыстарына дайындалуда

Бүгін облыс әкімдігінде өткен аппараттық жиналыс барысында алдағы дезинсекциялық науқанға дайындалу мәселелері талқыланды. Жер қойнауын пайдалану, қоршаған орта және су ресурстары басқармасының басшысы Әйгерім Қабылтаева өткен жылы шыбын-шіркеймен күрес әдістері мен тәсілдері өз нәтижесін бергенін атап өтті. Басқарма өңдеу жұмыстарының тиімділігін 90 пайызға дейін бағалады. Бір шаршы метрдегі дернәсілдер саны 1000-нан 230-ға дейін азайды. Осы көктемде Ертіс өзенінің жайылмасында әуе, өзен және тосқауыл өңдеу жұмыстары жүргізіледі. Биылғы жылы әуеден өңделетін алқаптың жалпы ауданы 127 мың га құрайды. Бұл Павлодардың жағалау аймағын, Ақсу, Ақтоғай және Тереңкөл жайылмаларын қамтиды, сондай-ақ, алғаш рет Ертіс және Павлодар аудандарының да жайылмалары өңделеді. Павлодар ауданына баса назар аударылды: мұндағы барлық 38 ауыл шыбын-шіркейге қарсы өңделетін болады. «АН-2» маркалы 8 ұшақ қолдану жоспарлануда. Сонымен қатар, биылдан бастап Ертіс өзенінің негізгі арнасының 1800 шақырымы үш рет өңделеді. Қосымша Белая, Подстепка, Теплая, Тюлька, Таллинка, Каратунь, Орловка арналары да өңделеді. Павлодарда көпірден Усолка шағын ауданына дейінгі жағалау бойындағы масалар мен шіркейлердің дернәсілдері жойылады. Сондай-ақ, дезинсекция жұмыстарымен жағалау бойында орналасқан төрт ауданның 59 ауылы қамтылады. Бұл жаңа тәсіл жүргізіліп жатқан жұмыстарды үйлестіру мақсатында енгізілді. Әсер етуші заттарына шыбын-шіркейлердің төзімділігі қалыптаспаған көп компонентті жаңа препараттарды қолдану көзделуде. Препараттар денсаулық сақтау министрлігінде тіркелген, сәйкестік сертификаты бар және адамдарға мүлдем зияны жоқ. Шыбын-шіркеймен күрестегі негізгі факторлардың бірі – Ертіске жіберілетін судың мерзімі. Қазгидрометтің мәліметінше, жоғарғы жақта көктемнің басталуының орташа мерзімі наурыздың екінші жартысына келеді, ал, қар 20-нан кейін ериді деп күтілуде. Ғылыми сүйемелдеу және дезинсекциялық жұмыстарды жүргізу табиғатты қорғау су жіберу параметрлеріне байланысты болады. Асайын Байханов алгоритмге сәйкес дезинсекциялық іс-шараларға жоспарлы дайындықты қамтамасыз етуді және барлық өңірлерде шыбын-шіркеймен күреске барлық дайындық іс-шараларын бір апта мерзімде аяқтауды тапсырды. Сондай-ақ, аппараттық жиналыста Наурыз мейрамына дайындық мәселелері қаралды. Өңірде 2000-нан астам іс-шара өткізу жоспарлануда. Мереке қарсаңында 240 киіз үй, Павлодарда 25 киіз үй орнатылады. Мереке 1 наурыз күні челлендж және науқандармен басталады. Негізгі іс-шаралар 21-22 наурызда облыс орталығының орталық алаңында өтеді. Филармония солистері, ансамбльдер және эстрада жұлдыздары Роза Рымбаева, Қайрат Нұртас қатысады деп күтілуде. Облыс әкімі Мемлекет басшысының Наурызды жаңаша атап өтуді тапсырғанын еске салды: мазмұнды, креативті, жаңа айрықша элементтерді енгізумен. - Жаңа тәсілдерді ескере отырып, мереке тұжырымдамасын қайта қарау қажет. 5 наурызға дейінгі мерзімде барлық қалалар мен аудандарды қамтитын іс-шаралардың толық бағдарламасын ұсыныңыз, - деді өңір басшысы.

• 14.03.2024
• 204