Жаңатас қаласында 12 көпқабатты тұрғын үй жаңғыртудан өтеді

Тараз қаласымен қатар, аудан орталықтары мен шағын қалалардың да ажарын арттыра түсу, мәселелерін шешу – негізгі міндеттердің бірі.

Осы тұрғыда бүгін Сарысу ауданына жұмыс сапарымен барып, Жаңатас қаласындағы бірқатар көшелер мен аулаларды жаяу аралап, жай-күйімен таныстым.

Жаңатас қаласындағы 5 шағын ауданындағы № 9, 10, 17, 18, көпқабатты үйлердің және 3 шағын аудандағы №23/1 мекен жайларға барып, бірқатар тұрғындармен кездестім. №9 көпқабатты үйдің тұрғындары үйлерін жөндеуден өткізуге, ауланы абаттандыруға қатысты бірқатар мәселелерді жеткізді.

Аудан басшылығына қаладағы 12 тұрғын үйдің жаңғырту жұмыстарын тездетіп қолға алып, құрылыстың сапасы мен мерзімін қатаң бақылауда ұстауды тапсырдым.

Шағын шаһардағы аулаларды абаттандыру, көшелерді реттеу, балалар алаңшаларын салу, тазалықты сақтау, бос көпқабатты үйлерді жаңғыртып, ел игілігіне жарату секілді мәселелерге басымдық беру бойынша нақты міндеттер жүктедім.

Қаланың жылыту қазандығының жұмысымен танысып, «Қазпошта» АҚ аудандық бөлімшесінің бос ғимараты және «Фосфорит» стадионын жөндеуден өткізіп, тиімді пайдалану мәселесіне де баса назар аудару қажеттігін атап өттім.

Аудандағы сыйымдылығы 30 млн текше метр болатын «Ынталы» су қоймасы үш ауылдық округтегі егістік алқаптарын сумен қамтудағы маңызды нысан болып табылады. Су қоймасының жөндеу жұмыстарын сапалы аяқтап, бөгетті нығайту шаралары тиісті ылғал көлемін қалыптастыруға мүмкіндік береді.

Бұл бағыттағы жұмыстар күн тәртібінен түспейді.

• 18.03.2024
• 251