Махамбет Досмұхамбетов Жылыой әкіміне сапалы тұрғын үй салуды тапсырып, бірқатар міндеттер жүктеді

Қазіргі таңда Жылыой ауданында 2 мыңға жуық адам тұрғын үй кезегіне тіркелген.

⠀

«Бұл туралы аймақ басшысы Махамбет Досмұхамбетов Жылыой ауданының әкімі Халел Жамаловтың өткен жыл ішінде атқарылған жұмыстар жөнінде берген есебі барысында айтты» деп хабарлайды Атырау облыстық коммуникациялар қызметі.

⠀

«Құлсары қаласынан 100 пәтерлік ​ үш тұрғын үйдің құрылысы жыл аяғына дейін аяқталып, 300-ге жуық аудан тұрғыны жайлы баспанамен қамтылатын болады. Және аудан орталығынан ​ тағы да осы типті 100 пәтерлік 3 үйдің,​ ​ ​ 60 пәтерлік тұрғын үйдің құрылысын бастау жоспарда тұр. Тұрғын үй салу қарқынын жоғарылатуды жүктеймін. Және тапсырылатын үйлер сапалы болуы тиіс» деді Махамбет Досмұхамбетов.

⠀

Сондай ақ, аймақ басшысы инвестиция тарту мәселесін түбегейлі қолға алуды, аудан тұрғындары үшін жаңа жұмыс орындарын құруды міндеттеді. ​ Облыс әкімінің айтуынша, Жылыой ауданында соңғы 4-5 жылда «Кәсіпкерлікті қолдау картасы» шеңберінде бірде-бір инвестициялық жоба жүзеге аспаған.

⠀

«Және әр салада жергілікті қамтудың үлес салмағын арттыру бағытында нақты шаралар қабылдау қажет. Өткен жылы аудан бойынша құрылған жұмыс орындарының саны 2019 жылмен салыстырғанда 23,6 пайызға төмендеп кетіп отыр. Осыған байланысты, жаңа жұмыс орындарын құруды міндеттеймін» деді Атырау облысының әкімі Махамбет Досмұхамбетов.

• 09.02.2021
• 221