Ауа-райының кез-келген жағдайына дайын болу керекпіз

Төтенше жағдайлардың алдын алуда жауапты тұлғалардың жағдайды көзбен көріп, шынайы ақпаратты жасырмай, қажетті шараларды дер кезінде қабылдауы аса маңызды.

Осы орайда менің тапсырмама сәйкес кеше шұғыл Тараз қаласы мен Байзақ, Жамбыл, Жуалы, Меркі, Т. Рысқұлов және Қордай аудандарында су тасқынының алдын алу бойынша ауқымды оқу-жаттығу өтті.

Шара барысында азаматтық қорғау мемлекеттік жүйесінің басқару органдары күштерінің, техникалар мен су сору құрылғылардың дайындығы іс жүзінде тексерілді. Су қоймалары мен каналдардың ахуалы, арықтардың тазалығы да зерделенді.

Анықталған бірқатар кемшіліктерді жедел жою, жұмыстарды күшейту бойынша тиісті тұлғаларға міндеттер жүктелді.

Сондай-ақ, бүгінгі аппараттық кеңесте де осы шараларға баса назар аударылды.

Елді мекендер мен жолдардың аумағындағы өзен, көлдердің жағалауын нығайту, су қоймаларға түсетін және шығатын сулардың мөлшерін тұрақты қадағалап отыру үшін жауаптыларға нақты тапсырмалар берілді.

Бұл мәселелер бойынша тиісті органдардың басшылары бірінші кезекте өздері жауапты болатынын ескерттім.

• 23.04.2024
• 133