Аймақ басшысы Махамбет Досмұхамбетов Қызылқоға ауданының тұрғындарын онлайн қабылдады

«Атырау облысының әкімі Махамбет Досмұхамбетов Қызылқоға ауданының тұрғындарын жеке сұрақтары бойынша онлайн қабылдады»,- деп хабарлайды Атырау облыстық коммуникациялар қызметі.

Тұрғындардың көтерген сауалдары тұрғын үй мәселесі, газ тарту, балабақша мен спорт кешенін салу, Ойыл өзенінің көзін ашу бағытында болды.

«Судың адам өміріне маңызы зор екені, оның ластануы денсаулыққа қауіпті болатыны белгілі. Осы тұрғыда Ойыл өзені суының тартылуы тұрғындардың түйінді мәселесіне айналып отыр. Қазіргі судың жойылуына әкеліп отырған 38 бөгет бар. Осы бөгеттерді алып, қамыстарды жоймаса, болмайды. Осыған облыс деңгейінде үлкен көмек керек»,-деді аудан тұрғыны Дүйсенбай Нұров.

«Бұл күрделі мәселе, аталған жағдайға ғалымтарды араластыруымыз керек, өйткені мұның артында табиғат тұр. Сондықтан, қазір тиісті салаларға тапсырма беремін, қажеттілік туындап жатса министрлікпен ақылдасып, шешімін табуға тырысамыз»,- деді Махамбет Досмұхамбетов.

Сондай-ақ, қызылқоғалық Нұржамал Бисенғалиева Жасқайрат ауылына жаңа үлгідегі балабақаша керек екенін жеткізді. Өйткені, мұндағы балабақша 1975 жылы салынғанын, қазіргі таңда заманауи талапқа сай келмейтінін және 65 бала тәрбиелеп отырған балабақшаға 40 астам бала кезекте тұрғанын мәлім етті. Сонымен қатар, газ құбыры мен спорт кешенін салуды өтінген мәселелерге аймақ басшысы жобалар жасақталып, тиісті құжаттар сараптамадан өтуде екендігін айтты.

Облыс әкімі Махамбет Досмұхамбетов тиісті сала басшыларына халықтың көтеріп отырған мәселелерін мүмкіндігінше тез шешіп, салынуға тиісті нысандардың сапалы болуын ескертті.

• 09.02.2021
• 296