Сұйық металл салқындатқышы бар шапшаң нейтрондардағы реакторлар технологияларын дамыту

ҚР Ұлттық ядролық орталығында Қытай Атом энергиясы институты мамандарының қатысуымен «Сұйық металл салқындатқышы бар шапшаң нейтрондардағы реакторлар технологияларын дамыту» ғылыми-техникалық семинары өткізілді.

Бірлескен ғылыми-техникалық семинар өткізу туралы шешім өткен жылы Қытайдың Атом энергиясы институтына барған сапар кезінде қабылданды.

Бір апта ішінде семинарға қатысушылар ҚР ҰЯО эксперименттік базасымен танысып, атом энергетикасын дамытудың жетістіктері мен перспективаларын, атом саласы үшін кадрлар даярлау мәселесін және т. б. талқылады.

Тараптар бірлескен ғылыми-техникалық семинарлар өткізу тәжірибесін жалғастыруға ниет білдірді.

Анықтама үшін. 2023 жылғы 26 қыркүйекте МАГАТЭ Бас конференциясының 67-сессиясының аясында Қазақстан Республикасының Ұлттық ядролық орталығы мен Қытай Атом энергиясы институты арасындағы ынтымақтастыққа қатысты өзара түсіністік туралы меморандумға қол қойылды.

Тараптар келесі бағыттар бойынша ынтымақтастық жүргізуге келісті:

- реактор қондырғыларының физикасы және жылу гидравликасы саласындағы зерттеулер;

- реакторлардың жаңа жобаларының қауіпсіздігі мен тиімділігін арттыру саласындағы зерттеулер мен әзірлемелер;

- ядролық және термоядролық қондырғылардың перспективалық ядролық отыны мен конструкциялық материалдары саласындағы зерттеулер мен әзірлемелер;

- ядролық реакторларды пайдаланудан шығару, пайдаланылған ядролық отынмен және радиоактивті қалдықтармен жұмыс істеу саласындағы зерттеулер;

- перспективалық энергетикалық технологиялар саласындағы зерттеулер мен әзірлемелер;

- радиациялық қауіпсіздік және экология саласындағы зерттеулер мен әзірлемелер;

- ядролық сынақ полигондарында қоршаған орта саласындағы қызметті басқару мәселесі бойынша ақпарат алмасу (оның ішінде қауіптілікті талдау, бағалау және қауіптілік дәрежесін төмендету).

• 24.05.2024
• 205