ОБЛЫС ӘКІМІ СТАТИСТИКАЛЫҚ КӨРСЕТКІШТЕРДЕГІ МӘСЕЛЕЛЕРДІ АТАДЫ

Өңірдегі өңдеу өнеркәсібінің инвестициялық көрсеткішіне «Қазақмыс» корпорациясы кәсіпорындарының берген нәтижесі тікелей әсер етеді. Ұлытау облысының әкімі Берік Әбдіғалиұлы бұл тұрғыда кәсіпкерлік және өнеркәсіп басқармасына тұрақты түрде мониторинг жүргізіп отыруды тапсырды. Сондай-ақ өңір басшысы облыстағы әр салаға қатысты басқармалар ұсынатын статистика мен департамент көрсететін көрсеткіштердің сәйкес көрініс бермей жататынын жеткізді.

«Барлық қала-аудан әкімдіктері және басқарма басшылары өз салаларыңызға қатысты көрсеткіштеріңізді уақытылы тапсыруларыңыз қажет. Объективті кемшіліктердің бар екені жасырын емес, алайда дер кезінде ұсынбағандықтан адами фактордың да салдары кесірін тигізуде. Статистика департаментімен тығыз жұмыс істеуді тапсырамын»-деді өңір басшысы өз сөзінде.

Оған қоса облыс әкімі алғашқы жартыжылдықтың қорытындысы бойынша өңірдегі құрылыс, ауылшаруашылығы, тасымалдау салаларындағы көрсеткіштің былтырмен салыстырғанда жоғары болуын қадағалауда ұстау міндетін жүктеді.

Сонымен қатар Берік Әбдіғалиұлы ауылдардағы мал басының көрсеткішіне қатысты да сын тақты. Өңір басшысы бұл ретте ауыл әкімдері ұсынған сан мен мал иесінің атаған цифры міндетті түрде сәйкес келуі қажет екенін айтты.

• 28.05.2024
• 189