Ақсу қаласы әкімінің тұрғындарға есеп беру

Эпидемиологиялық ахуалға байланысты онлайн өткен кездесуге Ақсу қаласы мен оның ауылдық аймағының 500-ден астам тұрғыны қосылды.  
 
Ақсу қаласының әкімі Нұржан Әшімбетов қаланың әлеуметтік-экономикалық дамуының негізгі көрсеткіштері туралы айтып берді. Өткен жылы Ақсу электр станциясында 14,1 миллиард квт/сағ электр энергиясы өндірілді. Қаланың жарғылық капиталына салынған инвестиция көлемі 118,6 миллиард теңгені құрады, оның 90%-ы - бюджеттен тыс қаражат.
 
- Біздің фермерлер 100 мың тонна картоп пен 57 мың тонна көкөніс алды. Біздің ауылдық аймақта 100 мың тонна көкөніс өнімін сақтайтын қоймалар бар. Олардың бірі – өткен жылы салынған 2 мың тонналық қойма. Сонымен қатар аграршылар 1,6 мың гектар суармалы жер енгізді, - деп хабарлады Нұржан Әшімбетов.  
 
2020 жылы Ақсу қаласында 49 мың шаршы метр тұрғын үй пайдалануға беріліп, кезекте тұрғандарға 222 пәтер берілді. Жақында қалада тағы 144 пәтер пайдалануға берілмек.
 
- Биыл құрылысы 2017 жылы басталған жаңа қазандықты аяқтап, пайдалануға беру керек. Оның қуаты қаланың жеке тұрғын үй құрылыстарын орталық жылуға қосуға мүмкіндік береді, олар бойынша жылу желілерін салу жобасы әзірленіп жатыр, - деп атап өтті қала әкімі.
 
Қызылжар ауылының тұрғындары әкімнен елді мекенде дәрігерлік амбулатория қашан салынатынын сұрады. Нұржан Әшімбетовтың айтуынша, нысан жобасы биыл таныстырылады. Құрылыс жұмыстарын жүргізу үшін қаржы қарастылырып, мердігер де белгіленіп қойған.
 
Ақсу қаласының тұрғыны Антон Локтев соңғы күндері мұз басқан тротуарларға назар аударды. Қала тұрғынының айтуынша, жүріс бөлігіне тайғаққа қарсы қоспа себілгенімен, адамдар жаяу жүргіншілер жолымен әрең өтеді. Нұржан Әшімбетов көшені тазалау жұмыстарын күшейтуге уәде берді.
 
Ақсу әкіміне спорттық инфрақұрылымға байланысты сұрақтар да қойылды. Ат спортының қайраткерлері облыстық және республикалық жарыстарда жоғары нәтижелерге қол жеткізіп жүргендеріне қарамастан, көрінген жерде жаттығуға мәжбүр екендіктеріне шағымданды. Олар бәйге шеңберін қала маңынан дайындауды сұрады. Нұржан Әшімбетов бұл мәселені қолға алуға, орын таңдап, жобаны спортшылардың өздерімен келісуге уәде берді.
 
 
Ақсу қаласы әкімінің есеп беру кездесуін қорытындылай келе, өңір басшысы Әбілқайыр Сқақов қаладағы аулаларды абаттандыру бойынша көптеген өтініштер келіп түсетінін атап өтті. Өткен жылы Ақсу қаласында абаттандыруды қажет ететін аулалардың 40% ретке келтірілді. Жұмыстар кешенді түрде атқырылды – ойын алаңдарын орнатып, жарық, жол мәселелері шешілді.
 
- Биыл абаттандыруды қажет ететін аулалардың үштен бірінен астамын жөндеу жоспарланған. Мәселені бақылауға алып, бұл жұмысты аяғына дейін жеткізу керек. Ақсу үшін де экологиялық мәселе өзекті. Біз оны экологиялық белсенділермен және экология министрлігінің басшылығымен бірге шешеміз. Түрлі бағыттар бойынша нақты жоспарлар бар. Соның бірі – көгалдандыру. Таяу жылдары Ақсу қаласында 12 мыңнан астам ағаш пен тал отырғызу жоспарланып отыр. Жасыл қорға қажетті күтімді қамтамасыз ету қажет, - деді облыс әкімі қала басшысына.
 
Облыс әкімі қала билігінің алдына басқа да міндеттер қойды. Бұл Ақсу экономикасын әртараптандыру, ірі кәсіпорындардың айналасында шағын және орта бизнесті дамыту үшін белдеу құру және агроөнеркәсіп кешеніндегі жұмысты жандандыру.  

• 10.02.2021
• 290