Облыста 1240 орындық 5 балабақша салынады

Облыстың әлеуметтік-экономикалық дамуының кешенді жоспары шеңберінде 2023-2027 жылдары жалпы сомасы 1,9 трлн теңгеге 9 негізгі бағыттағы 102 іс-шараны іске асыру жоспарланған.

Жоспарды орындау аясында 2023 жылы Берікқара кен орнында кен өндіру және мыс өңдеу зауыты іске қосылды. Бесқарағай ауданында 1 000 басқа арналған бордақылау алаңы салынды. Сондай-ақ, Семей қаласында «Bala Park» ойын-сауық орталығы ашылды. Биыл кешенді даму жоспары аясында 391 жобаны іске асыру көзделген.

Білім беру инфрақұрылымын қолдау қоры есебінен Семейдегі №4 және 30, Аягөз қаласындағы Бозтаев атындағы гимназия мен №5, 6, 7 мектептерге 2 200 орындық қосалқы құрылыс, Жарма ауданының Кеңтарлау, Суықбұлақ, Үржар ауданының Сағат, Малақ, Ақсуат ауданының Көктүбек, Басқарағай ауданының Белокаменка ауылдарында 510 орындық 6 шағын жинақты мектеп салу жоспарлануда. Құрылыс жұмыстары 2025 жылы аяқталады деп күтілуде.

Мемлекеттік-жеке меншік әріптестік аясында 2027 жылға дейін 1240 орындық 5 балабақша салу жоспарда бар. Облыстық білім басқармасы Қарағайлы ықшам ауданына 320 орындық 2 балабақша салу үшін жеке инвесторларды тарту жұмыстарымен айналысуда.
 

Жеке инвестициялар есебінен 14 іс-шараны іске асыру, оның ішінде №3 ЖЭО, 5 жұлдызды қонақ үй, Семей қаласында Мұз айдыны және «М.О.Әуезов атындағы педагогикалық колледж» КМҚК аумағында 300 орындық концерт залын салу жоспарланған. Өрт сөндіру депосын, желілік полиция бөлімінің, тергеу изоляторы ғимаратын салу және Бейбітшілік аралындағы жағалауды нығайту бойынша жобалау-сметалық құжаттама да әзірленуде.
 

Құрылыс және жөндеу жұмыстарының мерзімінде орындалуын қамтамасыз ету үшін тиісті басқармаларға жұмыс барысын қатаң бақылауды және қарқынын жеделдетуді тапсырдым.

• 07.06.2024
• 167