Облыс әкімі дарынды оқушылармен кездесті

Жамбыл облысының әкімі Ербол Қарашөкеев халықаралық, республикалық олимпиадалар мен ғылыми және шығармашылық байқаулардың жеңімпаздарымен кездесті.

Аймақ басшысы алдымен білім беру мекемелерінің жас ғалымдары мен талантты өнертапқыштарының жұмысы қойылған көрмені тамашалады.

Мәселен, Меркі ауданы №44 орта мектебінің оқушылары А.Еркінқызы мен Ө.Еңсебек «Таза Қазақстан» акциясы аясында әзірлеген қоқыс өңдейтін зауыт жобасын, Қ.Тұрысов атындағы №53 орта мектеп-ғимназиясының оқушысы Е.Болатжан асық ойынының заманауи үлгісін таныстырды. Сонымен бірге робот бесік, мүмкіндігі шектеулі азаматтарға көмек қолын созатын ерекше жоба мен өзге де оқушылардың ұшқыр қиялынан туған туындылар көпшілік назарына ұсынылды.

Ербол Қарашөкеев жауапты сала басшыларына мектеп оқушыларының инновациялық бастамаларына қолдау көрсетуді тапсырды.

Облыс әкімімен кездесуге 120-дан аса бала қатысты. Олардың барлығы түрлі білім сайыстарында, байқауларда топ жарып, облыс намысын асқақтатып жүр. Биылғы жылдың өзінде дарынды балалар халықаралық, республикалық олимпиадалар мен ғылыми жарыстарда 331 медалға ие болды. Оның 54-тін халықаралық бәсекеде еншілеген.

Республикалық ғылыми жобалар байқауында облыс командасы 15-ші жыл қатарынан үздік деп танылды. Олимпиада қорытындысы бойынша «Ең үздік олимпиадалық команда» номинациясына ие болды.

Мектеп оқушылары ақындық өнерін шыңдап, көркем сөз оқу байқауларында да жоғары нәтижеге қол жеткізген. Абай, Мағжан, Ілияс, Әбіш оқуларына 89 оқушы қатысып, 53-і жеңімпаз деп танылды.

Биылғы оқу жылын 250 мыңға жуық оқушы аяқтаса, оның 12 мыңнан астамы жас түлек. Олардың қатарында шетелдік және еліміздегі іргелі оқу орындарының грант иегерлері бар.

Еркін кездесу барысында оқушылар облыс әкіміне түрлі сұрақтарын қойып, жауап алды. Оларды облыс әкімінің балалық шағы, жастардың қоғамдағы рөлі, жетістікке жетудің жолы мен пайдалы кітаптар туралы ойы қызықтырды. Сондай-ақ балалар аймақта атқарылған жұмыстар мен туризм саласын дамыту бағытында қолға алынатын жобалар туралы сұрап, ұсыныстарын білдірді.

Айта кетейік, кездесуге келген барлық дарынды балалар облыс әкімінің Алғыс хаты және қаржылай сертификатпен марапатталды. Сондай-ақ заман талабына сай шәкірт тәрбиелеген білікті ұстаздар Құрмет грамотасы мен Алғыс хатқа ие болды.

• 17.06.2024
• 151