- Блогтар
- Батырбеков Э.Ғ.
Батырбеков Э.Ғ.
ҚР «Ұлттық ядролық орталығы» Бас директоры
Ұлттық ядролық орталық атом саласына кадр даярлау үшін университеттерге өз базасын бермек
Ұлттық ядролық орталықта Қазақстан Республикасының Ғылым және жоғары білім вице-министрі Дархан Ахмед-Заки бастаған еліміздің жетекші жоғары оқу орындары делегациясының сапары аясында ҚР ҰЯО эксперименттік базасында ғылыми зерттеулер жүргізу және атом энергетикасы үшін кадр даярлау мәселелері талқыланды.
Вице-министр атап өткендей, білікті кадрларды даярлау Қазақстанның атом энергетикасын ойдағыдай дамытудың өте маңызды бөлшегі болып саналады, сондықтан жоғары оқу орындары мен ғылыми кәсіпорындар арасындағы ынтымақтастықты нығайту қажет.
Талқылауға Қазақстан-Британия техникалық университетінің және Халықаралық ақпараттық технологиялар университетінің ректорлары, Әл-Фараби атындағы Қазақ ұлттық университеті, Л. Н. Гумилев атындағы Еуразия ұлттық университеті, Семей қаласының Шәкәрім атындағы университеті және Д. Серікбаев атындағы Шығыс Қазақстан техникалық университетінің өкілдері қатысты. Нәтижесінде тиісті меморандумға қол қойылды.
Ұлттық ядролық орталық жетекші ғылыми-зерттеу ұйымдарының бірі бола отырып, атом энергетикасы, радиоэкология, термоядролық синтез, геофизика саласындағы мәселелерді ойдағыдай шешіп келеді. Ядролық зерттеу реакторларынан, КТМ токамагынан, зертханалық жабдықтардан және басқа да аспаптар мен қондырғылардан тұратын бірегей ғылыми-техникалық және өндірістік базасы жұмыс істейді. Қазіргі атом энергетикасы қауіпсіздігі мәселелерін шешуге ерекше назар аударылады.
Бас директор Эрлан Батырбековтің айтуынша, бүгінгі таңда кәсіпорынның басты құзыретінің бірі әлемдік атом-энергетикалық технологияларды әзірлеушілермен және өнім берушілермен жүргізілетін перспективалық және қазіргі уақытта қолданылып жүрген ядролық энергетикалық реакторлардың қауіпсіздігін арттыру жұмыстары болып саналады.
Табысты жұмыс атқару үшін білікті кадр қажет. Қазіргі уақытта ҚР ҰЯО-да қызметкерлердің өзін-өзі танытуы үшін барлық қажетті жағдай жасалған, кадрларды даярлау және қайта даярлау жұмысы жолға қойылған, диссертацияны өндірістен қол үзбей қорғауға айрықша мүмкіндік беріледі, өңірлік университеттер кафедраларының 3 филиалы жұмыс істейді, кәсіпорынның басшылығы мен қызметкерлері 3 диссертациялық кеңестің тұрақты құрамына кіреді. Сондықтан осы бағыт бойынша жоғары оқу орындарымен ынтымақтастықты кеңейту өте маңызды қадам болып саналады.
Сапар барысында делегация ҚР ҰЯО-ның бірқатар объектілеріне, соның ішінде ИВГ1.М бірегей зерттеу реакторына барып қайтты. Бұл реактор конверсиялау бойынша сәтті жүргізілген ауқымды жұмыстың арқасында 2023 жылдан бастап төмен байытылған урандағы жаңа актив аймақпен жұмыс істей бастады.
- 18.06.2024
- 76