Шеңгелді массивінде суармалы жерді сумен қамту жақсатылады

Биылғы жылы Қапшағай қаласының ауыл шаруашылығына 15 млрд. теңге инвестиция тартылады, соның есебінен 400 тұрақты жұмыс орны құрылатын 6 жоба іске аспақ. Сол қатарда Шеңгелді массивінің ирригациялық жүйелерін қалпына келтіру жобалары да бар. Ол өз кезегінде 1700 га жуық суармалы жерлердің сумен қамтылуын жақсартуға мүмкіндік береді. 

Шеңгелді ауылдық округіне қарасты Сарыбұлақ ауылындағы № 5 насос стансасына бекітілген суармалы желілер реконструкцияланады. Бас жобалаушы жер үсті және жер астындағы инженерлік жүйелердің инженерлік-геодезиялық зерттеулерін жүргізіп, жергілікті жердің топографиялық түсірілімін жасаған. Суармалы желілердің жалпы ұзындығы 43,157 п.м., соның ішінде магистралды су құбыры - 4,803 п.м., тарату құбыры -10,56 п.м., желілер - 27,794 п.м. Қазіргі кезде суармалы желілерді тарту сызбасы, бас жоспар және басқа да қажетті құжаттамалары бар жұмыс жобасы дайындалуда.

Шеңгелді өңірінің дамуына ауылда салынатын көкөніс сақтайтын көтерме-тарату орталығының үлесі зор болмақ. Онда 15,0 мың тонна пияз сақталады. Инвестиция көлемі 6,5 млрд.теңге, қазіргі кезде ТЭН және ЖСҚ дайындау жұмыстары жүргізілуде.

Мұнда жылыжай шаруашылығын дамыту да жалғасады. Мәселен, «Грин Лэнд Алатау» мен «ЛСТ Агро» ЖШС-лары тағы 34 га жерге шаруашылықты кеңейту шараларын қарастыруда. Мұндағы инвестиция сомасы 16,0 млрд.теңгеден асады, 500-ге жуық жаңа жұмыс орны ашылады.

«Агро Фуд» ЖШС құрама жем зауыты да іргесін кеңейтпек. Жобаның қуаттылығы – жылына 15,0 мың  тонна, инвестиция – 2,4 млрд.теңге. Сол сияқты «Қапшағай Бидай Өнімдері» ЖШС рапс өңдеу желісін іске қосуды жоспарлап отыр, жобаның сомасы – 1,9 млрд.теңге.

Атап өтсек, өткен жылы Қапшағай қаласының ауыл шаруашылығында 20,1 млрд. теңгенің өнімі өндірілген, жалпы сомасы 700 млн. теңгелік 4 инвестжоба жүзеге асырылған.

• 10.02.2021
• 256