Геопортал жер ресурстарын жедел басқаруға мүмкіндік береді

Алматы облысында пайдаланылмай жатқан жерлерді анықтау мақсатындағы жұмыс 2015 жылдан басталды. Сол жұмыстың алғашқы нәтижесі ретінде сол жылы жер санаттары туралы электрондық карта іске қосылды. Ол жер алқаптары туралы ақпараттардың қолжетімділігін және ашықтығын қамтамасыз етуге мүмкіндік беріп отыр. 

Электронды карта, яғни геопортал қалыптастырудың арқасында бұрын бытыраңқы болған ақпараттар бір жерге тоғыстырылып, бірыңғай дерекқор құрылды. Алматы облысының геоақпараттық порталында ресімделген жер учаскелері, қалалардың бас жоспарлары және елді мекендердің аумақтарын функционалдық аймақтарға бөлу бойынша, тұрғын және тұрғын емес құрылыстар, елді мекендердегі қызыл желілер, санитариялық-күзет және су қорғау аймақтары, коммуникациялармен, яғни сумен, газбен, жылумен, электрмен жабдықтау жүйелерімен, кәріз, телекоммуникация желілерімен қамтамасыз етілген аймақтар туралы ақпараттарды толық қамтып отыр. Соның ішінде бұл кешенді карта жүйесіне әр шаруашылық жүргізетін субъектілер туралы ақпарат, орналасқан жері, көлемі, алқабы және жер учаскесін нысаналы мақсатына сәйкес пайдалану туралы нұсқамалар енгізілген. Осылайша бұл геопортал жер ресурстарын жедел басқару мүмкіндігін беріп отыр.

«Бұл өз кезегінде пайдаланылмай жатқан ауыл шаруашылығы жерлерін анықтау мен тиісті шара қабылдауға ықпалын тигізуде. Алматы облысындағы жерлер туралы ақпарат алғысы келген кез келген азамат Геоақпараттық порталға map.e-zhetisu.kz сілтемесі арқылы кіріп, қалаған мәліметімен таныса алады», - деді спикер С.Сәдуақасов.  

Оның айтуынша, Мемлекет басшысының биылғы жылғы 26 қаңтарда Үкіметтің кеңейтілген отырысында пайдаланылмай жатқан жайылымдық алқаптарды мемлекет меншігіне қайтару туралы тапсырмасына сәйкес облыстық жерге орналастыру қызметінің, аудан, қала әкімдіктері жұмыс атқаруда.

Жалпы, Алматы облысы аумағында ауыл шаруашылығы мақсатындағы 8,3 млн. га жер бар, оның ішінде: 986,4 мың га - егістік,  6,9 млн. га - жайылымдық жер. Ал босалқы жерлер көлемі 7,5 млн.га құрайды, оның ішінде 4,4 млн.га - жайылым жерлер.

• 10.02.2021
• 231