Облыс әкімі Павлодар қаласын аралады

Асайын Байхановқа «Таксомотор» ЖШС сатып алған «Isuzu SAZ LЕ 60» маркалы жаңа 12 автобус таныстырылды. Олар 15 шақырымнан асатын айналма жолдан Усолка шағын ауданына дейінгі 3-ші бағытта жүретін ескі қоғамдық көліктерді алмастыратын болады. Жаңа автобустардың сыйымдылығы - 56 жолаушы, оның ішінде 25 орындық. Салонда кондиционерлер, бейнекамералар орнатылған, қозғалыс аралығы 7-8 минутты құрайды.
Күзде кәсіпорын 003 бағытындағы 12 автобусты жаңартуды жоспарлап отыр.
 
- Қала әкімі болған кезімде қалалық қоғамдық көлікті жаңарту процесін бастаған болатынмын. Биылғы жылы субсидиялардың орнына ескі және шағын газельдер жұмыс істейтін 115, 126, 003 және 3 бағытындағы көліктерді жаңартуды тапсырдым. Бүгінгі таңда үш бағыт бойынша жаңа заманауи жайлы автобустар жүруде, қазан айының соңына дейін бұл процесті толықтай аяқтаймыз, - деді облыс әкімі.
 
Облыс орталығын аралау барысында Асайын Байханов 53 көпқабатты және 102 жеке тұрғын үйді сумен қамтамасыз ететін Исиналиев көшесінен Қайырбаев көшесіне дейінгі Ак. Сәтбаев бойындағы d 500 мм шаруашылық су құбырын реконструкциялау жұмыстарын тексерді. Жұмыстар қыркүйек айының соңына дейін аяқталады.
 
Өңір басшысы Айманов көшесі, 31 үйінің ауласында орнатылған балалар ойын алаңын тексерді. 1 шілдеге дейін қалада 80 балалар ойын алаңы ауыстырылады.
 
Одан кейін аймақ басшысы музыкалық колледжге барды. Колледждің кәсіби музыкалық білім берудегі бірегейлігі, мұнда облыстың үздік акустикалық концерт залы, жарық кең кабинеттер, жетекші еуропалық фирмалардың музыкалық аспаптары, бай музыкалық қорлары мен аудиотекалары бар. Республикадағы үздік колледждердің бірі 2022-2023 оқу жылында республикалық және халықаралық конкурстардың 220 лауреатын дайындады. Бүгінде 1959 жылы салынған облыстың ең көне музыкалық колледжі күрделі жөндеуді талап етеді.
 
- Мен бүгін мұнда жай келген жоқпын, бұған дейін келіп, көрген болатынмын. Шатырдан су ағып жатыр, 1967 жылдан бері күрделі жөндеу жүргізілмеген, өмірін музыкаға арнаған ұстаздар мен балаларға тиісті деңгейде жағдай жасалмаған, - деді облыс әкімі
 
Өңір басшысы ең алдымен шатырын, жылыту, электрмен жабдықтау жүйелерін ауыстыруды тапсырды. 2 кезеңде ғимараттың ішкі және қасбетінің келбетін, сондай-ақ, музыкалық аспаптар мен жабдықтарды жаңартуды тапсырды. 3 кезеңде жергілікті билік реконструкциялауды қарастыратын болады.
 
Одан кейін аймақ басшысы d 500-1000 мм өздігінен ағатын коллекторды реконструкциялау орнына барды. Қазір мұнда 4 км құбырды санация әдісімен жөндеу жұмыстары жүргізілуде. Жоба қазан айының соңына дейін аяқталады.
 
Сондай-ақ, облыс әкімі Ак. Шөкин мен Қамзин көшелерінің қиылысындағы ЖМ-13 жылу магистралінің құрылыс барысын тексерді. Жылу беру маусымы басталғанға дейін 2,5 км жаңа желі салынады.
Павлодар басшылығына құрылыс жұмыстарының барысын күн сайын бақылау, сапасына мән беріп, мерзімінде аяқтауды тапсырды.

• 26.06.2024
• 154