Облыс әкімдігінде әлеуметтік маңызы бар азық-түлік тауарларының бағасын тұрақтандыруды қамтамасыз ету және өңірдегі әлеуметтік нысандардың құрылыс барысы талқыланды

Жиналыс басталар алдында Асайын Байханов демалыс кезінде балалардың қауіпсіздігін қамтамасыз ету мәселесіне назар аударды. Ата-аналарды кәмелетке толмаған балаларды бақылауды күшейтуге шақырды.
- Барлық мүдделі мемлекеттік органдар осы бағыттағы іс-шараларды күшейтіп, бірінші кезекте ата-аналар мен балаларға түсіндіру және алдын алу жұмыстарын жандандыруы қажет, - деді өңір басшысы.

Бірінші кезекте азық-түлік бағасы талқыланды. Өңірде әлеуметтік маңызы бар азық-түлік тауарларының баға индексі төмендеуде. Пияз, картоп, қырыққабат, күнбағыс майының бағалары төмендегені байқалады. Сонымен қатар, статистика деректері бойынша макарон бағасының және 6 ауданда күріш бағасының шекті мәннен асуы тіркелді.

Бүгінгі таңда тұрақтандыру қорында 13,9 мың тонна өнім бар. Өңір басшысы тұрақтандыру қорынан өнімдерді алу жұмыстарының баяу жүргізіліп жатқанын атап өтті.
- Барлық әкімдерге, ең алдымен, Тереңкөл, Павлодар, Ақтоғай және Шарбақты аудандарының әкімдеріне осы бағыттағы жұмыстарды жандандыруды тапсырамын, - деді облыс әкімі.

Жыл басынан бері барлық баға тізбегі бойынша делдалдық схемаларды тергеу комиссиясы 64 делдалды жойды.

Өнімдердің әрбір түрін талқылағаннан кейін облыс әкімі 15% сауда үстемесінің  сақталуын бақылауды күшейтуді, әр сенбі сайын ауыл шаруашылығы жәрмеңкелерін өткізуді тапсырды.

Биылғы жылы бюджеттің барлық деңгейінен әлеуметтік нысандарды салуға 41,2 млрд. теңге қарастырылған. «Ауылдық денсаулық сақтауды жаңғырту» ұлттық жобасы аясында 10 денсаулық сақтау нысанының құрылысы жүргізілуде. Айдың соңына дейін 1-ші қалалық аурухананың А блогын және 6 операциялық кабинетін тапсыру жоспарланған.

Бекітілген кестеге сәйкес облыстық балалар психоневрологиялық орталығына арналған галереясы бар ғимараттың құрылысы жүргізілуде. Білім беру нысандары бойынша да кестеден артта қалу жоқ. «Жайлы мектеп» ұлттық жобасы аясында Павлодар қаласында 2 мектептің құрылысы жүргізілуде, Павлодар қаласының №34 мектебіне қосымша ғимараттың құрылысы басталды.
III тоқсанда теміржол колледжінің бұрынғы ғимаратын «Алтын сақа» оқушылар сарайы ретінде реконструкциялау аяқталады.

Биыл 14 спорт нысанының құрылысы жүргізілуде: Ақсу қаласында мұз аренасы, Баянауыл ауылында спорт кешені, Успен және Қарақала ауылдарында дене-шынықтыру сауықтыру кешендері. Жұмыстарды III тоқсанда аяқтау жоспарлануда.
Ақсу, Ақтоғай және Павлодар аудандарында кестеден артта қалған нысандар бар.

Мәдениет саласында Баянауыл ауданының Ақши ауылында және Ақсу қаласының ауылдық аймағындағы Алғабас ауылында мәдениет үйлерінің құрылысы, сондай-ақ, Павлодар ауданы Береговое ауылының мәдениет үйіне жөндеу жұмыстары жүргізілуде.

Өңір басшысы қалалар мен аудандардың әкімдеріне, облыстың құрылыс басқармасына келісім-шарт міндеттемелеріне сәйкес 2024 жылғы нысандарды іске қосуды қамтамасыз етуді, бюджет қаражатын уақтылы игеру жөнінде шаралар қабылдауды тапсырды.

• 27.06.2024
• 127