Панфилов ауданында жылқы етін өңдейтін зауыт салынады

Алматы облысында мал басы жылдан жылға көбейіп келеді. Мәселен, бүгінде ірі қара саны 1 083,6 мың басқа, ұсақ мал 3 659,7 мың басқа жеткен. Осындай өсімге орай Жетісу өңірінде мал өнімдерін өңдеу өнеркәсіптерін көптеп ашу қажеттілігі туып отыр. Осы талапқа байланысты Панфилов ауданында жылқы етін өңдейтін зауыт ашылмақ. 

«ULY Zhibek-Zholy&K» жауапкершілігі шектеулі серіктестігі жылқы шаруашылығын дамыту мен жылқы етін өңдеумен айналысуға ниетті. Жобаның құны 75 млн теңге болмақ. Зауыт салуға қажетті 1500 га жер бөлініп, дайындық жұмыстар басталды. Зауыт жылқы етін өңдеумен қатар, жылына 50 мың литр қымыз өндіретін болады. Жоспарға сәйкес жылына жылқы санын 250 басқа көбейтіп отырмақ.

Жалпы өткен жылы Панфилов ауданында өнеркәсіп саласы бойынша 33 кәсіпорын жұмыс істеген еді. Шектеу кезеңдерінде барлық санитарлық нормаларды сақтай отырып, жұмысын тоқтатпаған кәсіпорындарға мемлекеттік бағдарламалар көп сүйеніш болды. Соның арқасында 2020 жылы ауданда өндірілген өнімнің құны 17 млрд. 600 млн. теңгені құрап, 2019 жылға қарағанда 9,4%-ға артқан. Ал облыс бойынша өнеркәсіп өнімінің көлемі - 1167,9 млрд. теңгеге жетті.

• 10.02.2021
• 216