Облыс әкімі Асайын Байханов жұмыс сапарымен Екібастұз қаласына барды

Қаланы аралау барысында өңір басшысы М. Жүсіп, 157 үйінің тұрғындарымен кездесті. Бұл үйде ПИК те, МИБ те жоқ  және өздеріне дербес қызмет көрсетеді. Тұрғын үйде 15 пәтерден тұратын 6 подъезд бар, әрбірінде жауапты адам бар. Тұрғындар әкіммен кездесуде үйді қалай күтіп ұстауға және қысқа қалай дайындалуға болатындығымен бөлісті. Олар қызмет көрсету үшін коммуналдық төлем жасамайды, подъездерді өздері тазалайды. Жылу беру маусымына дайындық, сондай-ақ, қажетті жұмыстар мақсатты алымдар арқылы жүзеге асырылады.

Алайда, барлық тұрғындар ортақ мүліктеріне осылай қызмет көрсетпейді. Екібастұздағы 702 көпқабатты үйдің 235-інде басқарушы ұйым жоқ. Кеншілер қаласының қала құраушы кәсіпорындарының көмегінің арқасында өткен жылу беру маусымына осы тұрғын үйлерді дайындау мүмкін болды. Биыл өңір басшысының тапсырмасы бойынша 175 үйге басқарушы компания тағайындалады, ал, ең күрделі 60 үй жергілікті биліктің бақылауында болады.

Сондай-ақ, өңір басшысы Сәтбаев көшесі № 3, 5, 7 үйлерінің аулаларын абаттандыру сапасын тексерді. Мұнда жолдарға асфальт төселді, жаяу жүргіншілер жолдары жасалды, ойын алаңын орнату жұмыстары басталды.
Екібастұздағы 279 ауланың 150-і абаттандыруды қажет етеді. Оларды үш жыл бойы кезең-кезеңімен жаңарту жоспарлануда. Биыл 50 аула ретке келтіріледі.
Тұрғындармен кездесуде облыс әкімі бірінші кезекте тұрғындары өз үйлеріне қызмет көрсететін, жылу беру маусымына жүйелі түрде дайындалатын, тазалық пен тәртіпті сақтайтын үйлердің аулалары абаттандырылатынын атап өтті.

Сондай-ақ, өңір басшысы «Самрұқ-Энерго» АҚ сенімгерлік басқаруға қабылдаған Екібастұз ЖЭО-да болып, жаңа жылу беру кезеңіне дайындығын тексерді. Қазір станциядағы үш қазандыққа ағымдағы және күрделі жөндеу жүргізілуде, жұмыстарға 100-ден астам адам жұмылдырылған.

Ірі жылу магистральдарын реконструкциялау жалғасуда. Биылғы жылы жалпы ұзындығы 3,8 км болатын ЖМ-1 және ЖМ-3 жаңартылады. 5 шілдеден бастап құбырларды орнату жұмыстары басталады, оны тамыз айының соңына дейін аяқтау жоспарлануда.

Коммуналдық қызметтердің жұмысында гидравликалық сынақтардан кейін анықталған 33 ақау қалып отыр. Асайын Байханов жоғарыда аталған жылу магистральдарын реконструкциялау аймағына жататын 29 үйді қоспағанда, 10 күннің ішінде барлық анықталған ақауларды жоюды және екібастұздықтардың үйлеріне ыстық суды қосуды тапсырды.

Сондай-ақ, өңір басшысы қаланың барлық ағындарының 60% сорып шығаратын кәріз коллекторын реконструкциялау барысын тексерді. Бұл коллектор 50 жылдан астам уақыт бойы жөндеу көрмеген, бүгінде тозу деңгейі 90%-дан астам, 2,3 км желі апатты жағдайда.

Жұмыс сапарының соңында облыс әкімі теміржол вокзалында болып, реконструкциялау жұмыстарының басталуымен танысты. Мұнда жылу, су, электрмен жабдықтау, кәріз жүйелерін, қасбетін, ішкі үй-жайларын толық жаңарту, шатырды ауыстыру жоспарланған. Теміржол вокзалын реконструкциялау жұмыстарын ағымдағы жылдың соңына дейін аяқтау жоспарлануда.

Сапар қорытындысы бойынша Асайын Байханов жергілікті билікке белгіленген кестені сақтай отырып, Екібастұзда жоспарланған барлық жұмыстардың сапалы жүргізілуін қамтамасыз етуді тапсырды.

• 28.06.2024
• 141