Райымбек ауданы мал тұқымын асылдандыруға ден қоюда

Райымбек ауданының негізгі айналысатын кәсібі ауыл шаруашылығы болғандықтан, өңір шаруалары мал басын асылдандыру мен егін сапасын жақсартуға ден қоюда. Мәселен, ауданда 2020 жылы басқа дақылдарды қоспағанда, картоп өсіруге арналған сервистік дайындау орталығына 30-дан астам жаңа техникалар сатып алынған. Ал ірі қара малын асылдандыру жұмыстарына 90  шаруашылық қатысып, 4 мыңға жуық аналық басқа селекция жұмыстарын жүргізді. 

Өткен жылы Қақпақ ауылдық округінен картоп шаруашылығын дамыту мақсатында «Үш Қақпақ» сервистік дайындау орталығы құрылған. СДО-ға жалпы құны 165 млн теңгеге 13 бірлік трактор, 19 бірлік ауыл шаруашылығы техникалары сатып алынған. Оның картоп өнімділігін арттыруға зор ықпалы тиді. Бұл ретте  6044 гектар жерге себілген картоптың әр гектарына орташа есеппен 215 центнерден өнім алынды. Сол сияқты ауданда 23 321 тонна дәнді дақыл жиналып, әр гектарына 23 ц. өнім берген.

Мал шаруашылығында да ілгерілеу бар. Өткен жылы тірі салмақта өткізілген мал мен құс етінің көлемі 17 779  тонна болса, сауылған сүт көлемі  30,3 тоннадан асқан. Өнімділікті ұлғайтуда, әсіресе, мал тұқымын асылдандырудың рөлі зор.  Соны түсінгендіктен де ірі қара малын асылдандыру жұмыстарына 90  шаруашылық қатысып, ірі қара малының 4 мың бас аналығымен селекция жұмыстарын жүргізді.

«AGRO -ALATAU» ЖШС Сарыжаз ауылдық округінде 500 басқа арналған мал бордақылау алаңының құрлыс жұмыстарын аяқтаса, Қарасаз ауылдық округінде «SNB & BIZ grooup»  ЖШС 200 басқа арналған сүт-тауарлы фермасы және сүт қабылдау пунктін ашуда.

Атап өтсек, Райымбек ауданында 2020 жылғы жалпы ауыл шаруашылығында 36 млрд 6 млн. теңгенің өнімі өндірілген. Ал бұл көрсеткіш облыс көлемінде 917,8 млрд теңгеден асты. 

• 10.02.2021
• 184