Құрметті Полиция қызметкерлері!

Қадірлі сала ардагерлері!

Сіздерді төл мерекелеріңіз – Полиция күнімен шын жүректен құттықтаймын!

Ел аумағының тұтастығы мен қоғамның қауіпсіздігін қамтамасыз етуде Сіздерге жүктелген жауапкершілік жүгі ауыр.

Полиция әрдайым азаматтарға үлгі-өнеге көрсетуі тиіс. Халық сенімі – полиция қызметіне берілген басты баға!

Биыл Қазақстан полициясына – 32 жыл!

Осы жылдар белесінде тәртіп сақшылары ел сеніміне селкеу түсірмей, міндеттерін мінсіз атқарды. Мемлекетіміздегі бірлік пен тұрақтылықтың сақталауына күш салды. Азаматтарымыздың құқықтары мен бостандықтарының қорғалуына ықпал етті.

Біздің облыс полицейлері де жамбылдықтардың тыныштығын күзетіп, қылмыстың алдын алу, заңдылық пен құқықтық тәртіпті сақтауда кәсібиліктерін көрсетіп келеді.

Ағымдағы жылы полиция департаментінің материалдық-техникалық базасын жақсартуға 4,1 млрд теңге бөлінді. Негізінен цифрлық технологияларды тиімді пайдалануға басымдық беріліп отыр. Мемлекеттік қолдау полицейлердің жұмысын жеңілдетіп, жүктелген міндеттерді дер кезінде әрі кәсіби орындауына септігін тигізеді.

Ер есімі – ел есінде! Қызметтік міндеттерін адал атқарып, ерлікпен қаза тапқан полицейлер мәңгі жадымызда! Адалдықты ту еткен бейбіт күннің батырлары ешқашан ұмытылмайды.

Құрметті Полиция қызметкерлері!

Сіздердің қиын да қатерлі қызметтеріңізге табыс тілеймін!

Ел игілігіне негізделген істеріңізге алғыс білдіре отырып, отбасыларыңызға амандық-саулық тілеймін!

Мереке құтты болсын!

• 28.06.2024
• 229