Облыс әкімдігінде «Ауыл - ел бесігі» жобасының іске асырылу барысы және жолаушылар тасымалын дамыту мәселелері қаралды ⠀

Жиналыс басталар алдында облыс әкімі Асайын Байханов су айдындарында азаматтардың қауіпсіздігін қамтамасыз ету бойынша жүргізіліп жатқан жұмыстарға қарамастан, суға түсу маусымы басталғаннан бері 5 адамның суға батып кеткеніне, оның ішінде екеуі бала екеніне назар аударды. ТЖ департаментінің мәліметінше, балалар кешкі сағат 10-да ересектердің қарауынсыз шомылған, сондай-ақ, алкогольдік мас күйінде суға бату жағдайлары бар.
⠀
- Жаздың басынан бастап 6 мыңнан астам рейдтік іс-шаралар өткізілді, 5 мың патруль жұмылдырылды, 35 хаттама, 37 нұсқама толтырылды, алайда, аптап ыстыққа байланысты жағдай әлі де күрделі болып отыр. Су айдындарындағы қауіпсіздік ережелерін халыққа жеткізу жұмыстарын жандандыру және суға батып бара жатқандарды ерте анықтау үшін онлайн мониторинг енгізуді жылдамдату қажет, - деді өңір басшысы.
⠀
Бірінші мәселе - өңірде «Ауыл-ел бесігі» жобасының іске асырылуы талқыланды. Биыл аталмыш жоба аясында облыстың 15 ауылын жаңғырту жұмыстары жүргізілуде, 9,1 млрд. теңгеге 56 жоба іске асырылуда, оның 5,9 млрд. теңгесі жергілікті бюджеттен бөлінген.
⠀
Бірінші жартыжылдықта 2,1 млрд. игеріліп, 3 жоба іске асырылды, 47 жоба іске асырылу сатысында және 6 жоба бойынша жұмыстар әлі басталған жоқ. Келесі жылы «Ауыл - ел бесігі» жобасымен тағы 15 ауылды қамту жоспарлануда.
⠀
Облыс әкімі Екібастұз, Ақсу, Павлодар, Ақтоғай аудандарының әкімдеріне 2023 жылдан бастап жүзеге асырылып жатқан жобаларды аяқтауды тапсырды. Барлық әкімдер, сондай-ақ, білім, дене шынықтыру және спорт, жолаушылар көлігі және автомобиль жолдары, мәдениет, тілдерді дамыту және архив ісі басқармаларына 2025 жылға арналған «Ауыл - ел бесігі» жобаларын іріктеуді 10 шілдеге дейін аяқтау тапсырылды.
⠀
Өңірдегі 345 ауылдың 308-і жолаушылар тасымалымен қамтылған. Жыл басынан бері қосымша 4 жаңа бағыт ашылды.
Павлодар облысы мектеп жасындағы балалардың жыл бойы қалалық қоғамдық көліктерде тегін жол жүруін қамтамасыз ететін республикадағы жалғыз өңір.
⠀
2023-2024 жылдары Павлодар және Екібастұз автокәсіпорындары 211 жаңа автобус сатып алды. Жыл соңына дейін Павлодар қаласына тағы 32 жаңа автобус жеткізіледі деп күтілуде.
⠀
Сондай-ақ, 2 жыл ішінде Еуропа қайта құру және даму банкінен алынған қаражат арқылы аккумуляторлық батареяларда жүретін автономды 25 жаңа трамвай сатып алынады.
⠀
Өңір басшысының тапсырмасы бойынша қалалық қоғамдық көлік бағыттарының желісі оңтайландырылды. Павлодарда 6 бағыт және Екібастұзда Лесхоз кенті мен 3 шағын ауданға дейін 2 бағыт ұзартылды.
⠀
Облыс әкімі тасымалдауды тиімді ұйымдастыру мақсатында Павлодар қаласының қоғамдық көліктеріне биылғы жылдың 1 қазанына дейін диспетчерлеуді енгізуді тапсырды. Аудан әкімдеріне жолаушылар көлігі және автомобиль жолдары басқармасымен бірлесіп 15 шілдеге дейін қалған 33 ауылдық елді мекенді жолаушылар тасымалымен қамту жөнінде ұсыныстар енгізу тапсырылды.

• 02.07.2024
• 184