Облыс әкімі Асайын Байханов азаматтарды жеке мәселелері бойынша қабылдады

Облыс тұрғындары өңір басшысына тұрғын үй, жер қатынастары, денсаулық сақтау мәселелері бойынша жүгінді.
⠀
Баянауыл ауданы Мұса Шорман ауылының тұрғыны облыс әкіміне жайылымдық жерлердің тапшы екендігін жеткізді. Сондай-ақ, Сәтбаев ауылдық округіне қарасты жерлердің бір бөлігі мақсатына сай пайдаланылмайтынын атап өтті.
⠀
Асайын Байханов жер қатынастары басқармасына аталған фактілерді тексеруді, пайдаланылмайтын жерлерді мемлекет меншігіне алу жөніндегі жұмысты күшейтуді тапсырды.
⠀
Павлодар тұрғыны әлеуметтік дәріхана ашу және субсидиялау мәселелері бойынша жүгінді. Өтініш берушіге әлеуметтік кәсіпкерлікті қолдаудың қаржылық құралдары түсіндірілді.
⠀
Барлық өтініштер бойынша өңір басшысы тиісті ведомстволарға тапсырма берді, олардың орындалу барысы облыс әкімі аппаратының бақылауында болады.
⠀
Естеріңізге саламыз, аймақ тұрғындары қабылдауға e-gov порталы, E-otinish.kz немесе әкімдіктің +77021661661 WhatsApp желісі арқылы жазыла алады.

• 11.07.2024
• 168