ЖАЗҒЫ ОЛИМПИЯ ОЙЫНДАРЫ-2024: ЕКІНШІ ЖАРЫС КҮНІНІҢ НӘТИЖЕСІ

Дзюдо. Дзюдошы Ғұсман Қырғызбаев (66 кг) Париж Олимпиадасында серб Страхиня Бунчичті жығып, қола медаль жеңіп алды. Бұл қазақ дзюдосы тарихындағы триумф! Олимпия ойындарының алғашқы екі күнінде біздің команда 1 алтын, 1 қола жүлдеге қол жеткізді.

Нысана көздеу. Пневматикалық винтовкамен 10 метрден нысана көздеуде Ұлттық құрама спортшысы Александра Ле Париж Олимпиадасының финалына шықты. Ол іріктеуде 631.4 ұпай жинап, 6-сатыға тұрақтады. Ал Арина Алтухова бұл сында 17-сатыға жайғасты (627.7 ұпай).
Пневматикалық винтовкамен 10 метрден нысана көздеуден ерлер арасындағы жекелей сынның іріктеуде Ислам Сәтпаев 628 ұпай жинап, 21-сатыға табан тіреді. Ал Константин Малиновский 626.6 ұпаймен 32-орыннан көрінді.

Бокс. Бокстан әйелдер арасында жарыс жолын бастаған 2 дүркін әлем чемпионы Назым Қызайбай алғашқы айналымда Еуропа чемпионатының күміс жүлдегері Джиордана Соррентиноны (Италия) 4:1 есебімен жеңді.
Бокстан Ұлттық құрама капитаны Асланбек Шымбергенов (71 кг) алғашқы айқасында Азия чемпионатының күміс жүлдегері Зейяд Ишаишқа есе жіберді. Жекпе-жек 2-3 есебімен аяқталды.

Семсерлесу. Семсерлесуден Қазақстан ерлер құрамасының көшбасшысы Руслан Құрбанов ширек финалында жапон Коки Канодан ұтылып қалды. Эльмир Әлімжанов Федерико Висмарадан (Италия) айласын асыра алмады. Вадим Шарлаимов екінші кезеңде сүрінді.

Бадминтон. Бадминтоншы Дмитрий Панарин Париж Олимпиадасының іріктеуінде Кента Нисимотодан (Жапония) ұтылып қалды.

Академиялық ескек есу. Академиялық ескек есуден Владислав Яковлев жұбаныш кезеңіндегі 3-ші алтылықта жарысып, мәреге төртінші болып жетті. Уақыт көрсеткіші - 7:21.12.

Теннис. Қазақстандық спортшы Александр Шевченко (әлем рейтингінде 58-орын) мен 18 жастағы чех Якуб Меншик (81-орында) арасындағы матч 3-6, 4-6 есебімен аяқталды. Бұл Шевченко мен Меншик арасындағы 2-ойын. Әзірге барлық кездесу чех теннисшісінің пайдасына шешілді.

Олимпиаданың екінші жарыс күнінен кейін Қазақстан құрамасының қоржынында 1 алтын, 2 қола жүлде бар.

• 30.07.2024
• 159