ЖАЗҒЫ ОЛИМПИЯ ОЙЫНДАРЫ-2024: АЛТЫНШЫ ЖАРЫС КҮНІНІҢ НӘТИЖЕСІ

Бокс. Тәжірибелі боксшы Назым Қызайбай (50 кг) 1/8 финалда Каролайн Барбоза де Алмейданы (Бразилия) айқын басымдықпен тізе бүктіріп, ширек финалға жолдама алды. Төрешілер есебі – 5:0.

Айбек Оралбай (92 кг) ширек финалда Әзірбайжан өкілі Лорен Альфонсо Домингестен ұтылып қалды – 2:3.

Мұхаммедсабыр Базарбайұлы (63,5 кг) аса тартысты айқаста грузин қарсыласы Лаша Гурулиден жеңіліп, Париж Олимпиадасында жүлдеге бір табан жетпей тоқтады. Есеп: 2-3.

Нысана көздеу. Әйелдер арасында винтовкамен 50 метрден 3 позицияда нысана көздеуде Александра Ле 587 ұпай жинап, 10-орынға жайғасты. Арина Алтухова 586 ұпаймен 13-сатыдан көрінді.

Дзюдо. Нұрлыхан Шархан (100 кг) екінші белдесуінде өзбекстандық Музаффарбек Туробовтан жеңіліп, жарыс жолынан шығып қалды. Ол бірінші айналымда Бельгия өкілі Тома Никифоровтан басым түскен еді.

Садақ ату. Дәулеткелді Жаңбырбай садақ атудан жекелей сынның іріктеуінде Хорхе Энрикестен (Колумбия) жеңіліп қалды. Есеп – 7:3.
Сонымен қатар Александр Еременко да Олимпиаданы аяқтады. Ол 1/32 финалда франциялық Баптист Аддистен ұтылды – 6:2.

Олимпиаданың алтыншы жарыс күнінен кейін Қазақстан құрамасының қоржынында 1 алтын, 2 қола жүлде бар.

• 02.08.2024
• 74