Уәлиханов ауданында биыл жаңа емхана мен бассейн ашылады

Ең шалғайдағы Уәлиханов ауданына ерекше назар аударылады. СҚО әкімі Ғауез Нұрмұхамбетов жұмыс сапары барысында инфрақұрылымдық жобалардың жүзеге асырылу барысын тексерді. Уәлиханов ауданындағы өзекті мәселелердің бірі – жолдардың жағдайы.

Дәуіт ауылынан Кішкенекөлге дейінгі жолға күрделі жөндеу жүргізілуде. Кішкенекөлден РФ шекарасына дейін орташа жөндеу басталады.  Ұзындығы 35 шақырымды құрайтын «Өндіріс-Жұмысшы-Мырзағұл» облыстық жолы жөнделіп, елді мекендер арасындағы қатынас жақсармақ. Сондай-ақ мұнда су тасқыны кезінде зардап шеккен көпір қалпына келтірілуде. Ақтүйесай ауылында 11 көшеге асфальт төселініп жатыр. Сонымен қатар ауылда фельдшер-акушерлік пункт салынуда. 

Аудан орталығы – Кішкенекөлде бірқатар маңызды әлеуметтік нысандар пайдалануға берілмек. Бұл - заманауи емхана және спорт залы бар жабық бассейн. Сондай-ақ аудан орталығында стадион мен мектеп күрделі жөндеуден өтуде.

Сонымен қатар, өңір басшысы «Жолдасбай Агро» серіктестігінің егістік және астық қабылдау нысанында болып, Уәлиханов ауданының шаруаларымен кездесті. 

СҚО әкімі Ақжар ауданында Бостандық-Киевское жолындағы жөндеу жұмыстарын бақылап, Талшық пен Тайыншадағы орталық қазандықта жылыту маусымына дайындық барысын тексерді. Сондай-ақ Тайынша ауданында  бөдене фермасы мен "Alabota GCK" ЖШС асыл тұқымды асылдандыру кешенінде болды.

• 15.08.2024
• 181