29 тамыз – Ядролық сынақтарға қарсы халықаралық іс-қимыл күні

1991 жылғы 29 тамызда, еліміздің тәуелсіздік таңы атқан тұста, Семей сынақ полигонының жабылуымен байланысты маңызды оқиға болды. Біз ел тарихының кезекті парағын жауып, халқымыздың игілігі мен еліміздің болашағы үшін ядролық қарусыз әлемге апаратын жолды таңдадық. Бұл күн кейіннен Қазақстанның бастамасымен Ядролық сынақтарға қарсы халықаралық іс-қимыл күніне айналды.

ССП жабылған күннен бастап 33 жыл ішінде ҚР Ұлттық ядролық орталығы халықаралық қоғамдастықпен бірлесіп, ядролық қаруды сынау инфрақұрылымы мен сынақ салдарын жою бойынша үлкен жұмыс жүргізді, бұрынғы ССП әскери-өнеркәсіптік кешенін бейбіт мақсатта пайдалануды жүзеге асырып, полигонның бүкіл аумағына кешенді экологиялық тексеру жүргізуді аяқтады.

Алға қадам басып, ССП шекарасын оның радиоэкологиялық статусына сәйкес келтіру, бұрынғы полигон жерін пайдалану, аумағын оңалту, Қазақстан Республикасының ғылыми әлеуетін дамыту және т.б. бойынша мемлекеттік бақылауды күшейтуге бағытталған мәселелерді шешетін уақыт келді. Осы мақсатта 2023 жылы Қазақстан Республикасының Президенті Қасым-Жомарт Кемелұлы Тоқаев «Семей ядролық қауіпсіздік аймағы туралы» Заңға қол қойды. Осылайша, Қазақстан бүкіл әлемге ядролық қауіпсіздікті қамтамасыз ету мәселесіндегі өз саясатының дәйектілігін тағы да паш етті.

• 29.08.2024
• 84