Жеңісті күндеріміз көп болсын!

Франция астанасы Парижде XVII жазғы Паралимпиада ойындарының басталғаны баршаңызға белгілі.

Айтулы додаға 44 қазақстандық спортшы қатысып, ел намысын қорғайды.

Ұлттық паралимпиада құрамасында 4 жамбылдық, атап айтқанда, спорт шеберлері Зульфия Габидуллина, Нұрдаулет Жұмағали, Өмірәлі Нышан мен Салтанат Әбілхасымқызы бар. Олар пара жүзу, пара тхэквондо, пара жеңіл атлетика сынды спорт түрлері бойынша бақ сынайды.

Пара спортшыларымыз шексіз ерік-жігер мен шыдамдылықтың ерен үлгісін көрсетіп, байрақты бәсекелерде топ жарып жүр.

Зульфия Габидуллинаның Рио-де-Жанейро Паралимпиадасындағы жарқын жеңісі жамбылдықтардың жадында. Жерлесіміз суда жүзуден әлем рекордын жаңартып, ел қоржынына алғашқы алтын салған еді.

Жүзу шебері Нұрдаулет Жұмағали Токиода өткен Паралимпиада ойындарының қола жүлдесіне ие болып, ел мерейін еселеді.

Біз өңір абыройын асқақтатқан спортшыларымызды мақтан тұтамыз! Олардың спортпен жүйелі шұғылданып, қоғамдық өмірге белсенді қатысуына күш саламыз!

Осы орайда XVII жазғы Паралимпиада ойындарында пара спортшыларымызға сәттілік, жеңіс тілеймін!

Әлемнің ең басты спорт сайысында Әнұранымыз шырқалып, көк байрағымыз биіктен желбіресін!
 

• 02.09.2024
• 56