Құрметті ұстаздар, оқушылар және ата-аналар!

Баршаңызды  – Білім күнімен және жаңа оқу жылының басталуымен шын жүректен құттықтаймын!

Білім — барлық жетістіктер мен жеңістердің бастауы.

Ұлт Ұстазы Ахмет Байтұрсынұлы «Біз елді түзеуді бала оқыту ісін түзеуден бастауымыз керек» деп, саналы, білімді, тәрбиелі ұрпақ – ел болашағы екендігін айрықша атап өткен.

Болашағын ойлаған кез келген ел алдымен білім беру ісіне ерекше мән береді.

Мемлекет басшысы Қасым-Жомарт Кемелұлы Тоқаевтың тапсырмасымен елімізде білім мен ғылым саласын дамытуға баса көңіл бөлінуде.

Осы тұрғыда біздің облысымызда да білім беру саласын дамыту, инженерлік-коммуникациялық инфрақұрылыммен қамтамасыз ету — негізгі бағыттардың бірі болып отыр.

2024 жылы өңіріміздің білім саласын дамытуға 317,8 млрд.теңге бөлінген десек, бұл өткен жылғы көрсеткіштен 13,5 пайызға артық.

2024-2025 жылдары жалпы 41 білім нысанының құрылысын жүргізу жоспарланған. Ағымдағы жыл соңына дейін 18 мектептің құрылысын аяқтау көзделген.

Мемлекет басшысының бастамасымен жүзеге асып жатқан «Жайлы мектеп» Ұлттық жобасы аясында облысымызда 12 мектеп салу жоспарланған. Оның ішінде 6 мектеп биыл пайдалануға беріледі деп күтілуде. Аталған жоба ауыл мен қала мектептерінің арасындағы білім сапасының алшақтығын жоюды көздейді.

Бүгін жаңа оқу жылының басталуына орай 6 мектептің (1 Жайлы мектеп) құрылысы аяқталып, пайдалануға беріліп отыр. Оның ішінде 3 білім ұясының ғимараты жаңаланып, тозығы жеткен мектептердің мәселесі шешілді.

Сондай-ақ 10 білім беру нысаны күрделі жөндеуден өтуде. 96 мектепті ағымдағы жөндеу жұмыстары аяқталды.

Бұдан бөлек, білім беру мекемелерін материалдық-техникалық жабдықтармен қамтамасыз етуге 1,9 млрд.теңге қаржы қарастырылды.

Мектеп оқушыларының қауіпсіз әрі алаңсыз ортада білім алуы үшін жұмыстар жалғасады.

Баршаңызға жаңа оқу жылында сәттілік тілеймін! Балаға білім мен тәрбие беру жолындағы игі істеріміз сәтімен жүзеге асып, жемісті болғай!

Ұл-қыздарымыздың зейіні ашылып, таным көкжиектері арта берсін!

Білім күні құтты болсын!

• 02.09.2024
• 53