Павлодарда «Алтын сақа» қосымша білім беру орталығы ашылды

Балаларға арналған заманауи орталық бұрын-соңды қосымша білім беру нысандары болмаған Екінші Павлодар шағын ауданында ашылды.

Облыс әкімі Асайын Байханов шағын ауданның жас тұрғындарын көптен күткен қуанышпен құттықтады.
- Екінші Павлодар тұрғындарымен кездесулердің бірінде біз осы шағын ауданда балаларға арналған заманауи мекеме ашуға уәде берген едік. Бүгін өз уәдемізді орындап, «Алтын сақа» атты жаңа инновациялық-шығармашылық орталықты ашып жатқанымызға қуаныштымын. Бұл жаңа достар табуға, білім алуға және бос уақыттарыңызды тиімді өткізуге болатын екінші үйлеріңіз болсын, - деді аймақ басшысы.
Асайын Байханов нысанды реконструкциялау жұмыстарына қатысқандардың барлығына алғысын білдірді.

«Алтын сақа» инновациялық орталығы осы ауданда тұратын 18 мың балаға арналған қосымша білім берудің заманауи форматы болып табылады және оқушылардың қызығушылықтары мен таланттарын ашуға үлкен мүмкіндіктер береді.
Мұнда IT-студия, робототехника үйірмелері, шығармашылық, спорттық және музыкалық бағыттағы секциялар жұмыс істейтін болады. Балалар тамақ іше алатын буфет қарастырылған. Қолөнер шеберханаларында ұсталық өнерге және тігін тігуге үйретеді.

Мұның барлығы үйдің жанында қол жетімді. Орталықтың ашылғанына балалар да, ата-аналар да қуанышты.
- Біз орталықтың ашылуын асыға күттік. Өте қуаныштымыз. Шығармашылық үйірмеге жазылуды жоспарлап отырмыз. Енді алысқа барудың қажеті жоқ, - деп бөлісті Екінші Павлодар тұрғыны.

Мемлекет басшысының тапсырмасы бойынша өңірде өскелең ұрпақтың үйлесімді дамуы үшін барлық жағдайлар жасалуда. Бұған дейін 800 балаға арналған шығармашылық орталығын ашу үшін Ертіс ауданындағы қараусыз қалған әкімшілік ғимарат қайта жаңартылған болатын. Қазан айында Екібастұз қаласында «Самғау» балалар шығармашылығының жаңа орталығын ашу жоспарлануда.
Сонымен қатар, алдағы үш жылда Успен, Шарбақты және Павлодар аудандарында да өнер мектептерін салу жоспарлануда.

• 23.09.2024
• 105