ҚР Тәуелсіздігінің 30-жылдығына орай шаңғы фестивалі өтті

14 ақпан күні  Нұр-Сұлтан қаласында ҚР Мәдениет және спорт министрлігі Нұр-Сұлтан қаласы әкімдігімен бірлесе (сағ. 10:00-12:30) барлық жас категориялары арасында  шаңғы фестивалін ұйымдастырды.

Жарысқа ҚР Мәдениет және спорт министрі Ақтоты Райымқұлова мен Есіл ауданының әкімі Б.Жәкенов қатысты.

Ақтоты Райымқұлова жарыс қатысушыларына сәттілік тілеп, елімізде шаңғы спортының қарқынды дамып келе жатқанын атап өтті.

«Мемлекет басшысы Қасым-Жомарт Тоқаев əр жолдауында барлық жастағы ел азаматтары арасында бұқаралық спортты дамытудың маңыздылығына ерекше ден қойып келеді.

Жекелей алсақ, елімізде шаңғы спорт түрі жақсы дамып келеді. Қазіргі таңда елімізде шаңғы спортымен 60 000-нан аса адам шұғылданады. Өңірлерде шаңғы биатлон трассалары салынуда. Оған дәлел, Қазақстанда қысқы спорт түрлерін дамыту және танымал ету үшін Ақмола облысының Щучинск қаласында республикалық шаңғы базасы ашылды. Шаңғы-биатлон трассасының заманауи базасы, шаңғы трамплиндерінің кешені, спорт залы, бассейн, медициналық қызмет көрсету корпусы бар. Сонымен қатар, жуырда ғана Ақтөбе қаласында шаңғы биатлон трассасы пайдалануға берілді.

Биыл тəу етер Тәуелсіздікке 30 жыл толып отыр. Осыған орай, Үкімет қаулысымен Қазақстан Республикасы Тәуелсіздігінің 30 жылдығын мерекелеу жоспары бекітілді. Енді спорт саласындағы барлық іс-шара осы мереке аясында өтетін болады.

Кеше ғана, Тәуелсіздігіміздің 30-жылдығы аясында Алматы облысы, «Алатау» шаңғы биатлон базасында шаңғы жарысынан өткен Континенталды Фис кубогын атап өткім келеді. Аталған жарыста Қазақстан құрамасы 3 күміс және 1 қола медаль жеңіп алды.

Сонымен қатар осы жылы көптеген маңызды іс-шара өткелі тұр. Бұл ретте күш атасы, даңқты балуан Қажымұқан Мұңайтпасұлының 150 жылдығы мен бірқатар әлемдік деңгейдегі жарыстарды айтуға болады.

Бүгінгі жарыс жолына шыққан барлық қатысушыға мықты денсаулық пен сəттілік тілеймін!»-деді Ақтоты Райымқұлова.

Жарыс 1, 2, 3 және 5 км шақталды. Фестивальге қатысқан әрбір адам өзінің жүріп өткен жолын  @Esil_life телеграм каналынан біле алады.

Сонымен қатар, фестивальге Арман Шылманов, Сергей Цырульников секілді танымал спортшылар қатысты.

Айта кетейік, әлемнің төрт дүркін рекордсмені Сергей Цырульников ҚР МСМ спорт амбассадоры атанды.

Фестиваль аясында ұйымдастырушылар «Барыс» хоккей клубының шабуылшысы Кирилл Панюков пен оның қалыңдығына неке куәлігін табыстады.

• 15.02.2021
• 282