Қазақстанның экспорттық-кредиттік агенттігі отандық экспорттаушыларға арналған жаңа қолдау құралдарын таныстырды

Қазақстанның экспорттық-кредиттік агенттігі («Бәйтерек» ҰБХ» АҚ еншілес компаниясы) шетел нарығын бетке алған отандық өндірушілер үшін жаңа қолдау құралдарын іске қосты.

Биыл KazakhExport Экспорттық-кредиттік агенттікке айналып, қызмет көрсету мүмкіндігі мен шеңберін кеңейтті. Сақтандыру және қайта сақтандыру, экспорт алдындағы қаржыландыру және экспорттық сауда ісіне қаржы көзін табу сынды қолданыстағы қызметтер жаңа жобалармен толықты: экспорттық операцияларға кепілдік беру және экспорттық несиелер бойынша пайыздық мөлшерлемелерді субсидиялау.

Кепілдік бойынша құрал мына компоненттерді қамтиды:

• экспорттық келісімшарт бойынша міндеттемелерді орындау кепілдігі;
• экспорттық келісімшарт бойынша аванстық төлемді қайтару кепілдігі;
• тендерлік кепілдік;
• экспорттаушы міндеттемелерінің орындалуын қамтамасыз ету үшін банкке берілетін кепілдік.

Нақтысын айтқанда, қазақстандық экспорттаушылар кепілдік беру құралы арқылы халықаралық тендерлерге қатысып, отандық тауарларға, көрсетілетін қызметтер мен жұмыстарға асқан қызығушылық танытқан импорттаушылармен байланысты күшейте алады.

Одан бөлек, жаңа құрал экспорттық мәмілелер бойынша төлем міндеттемелерін қамтамасыз етіп, Қазақстанның экспорттық-кредиттік агенттігінің кепілдігі арқылы аванстық төлемді алу кезінде импорттаушы қаражатын тартуды көздейтін болады. Экспорттық мәмілелерге кепілдік беру жөніндегі өнім шеңберінде базалық тариф 4,6%  мөлшерінде белгіленді. 

 Енді компания қоржынында кәсіпкерлердің әртүрлі қажеттіліктері мен экспорттық цикл кезеңдеріне бейімделген 22 өнім бар. Олардың әрқайсы жеке дара қарастырылып, икемге келе алады. 

«Жаңа жобаларымыз отандық экспорт қызметінің кешенді дамуын көздейді. Бұл ретте кепілдік беру құралы шетелдік контрагенттер алдындағы міндеттемелерді орындау бойынша кепіл болады және банкке қажет кепілдік мәселелерін қамти алады. Біз шикізат емес экспортты дамыта отырып, экономиканың жан-жақты және орнықты дамуына сеп боламыз. Дәл осылай мемлекеттік қолдау шараларының негізі нығаяды», – деп атап өтті «Қазақстанның экспорттық-кредиттік агенттігі» АҚ Басқарма төрағасы Аллен Шәйжүнісов.

Бүгінде Қазақстанның экспорттық-кредиттік агенттігі ұсынатын сұраныстағы қолдау құралдары:

• Экспорттық кредиттерді сақтандыру – экспорттаушыны жөнелту кезінде төлемді кейінге қалдыра отырып, шетелдік сатып алушы тарапынан төлем жасамау қаупінен қорғайды;
• Қарыздарды сақтандыру – қаржы институты экспорттаушының несие шартын орындамау қаупінен қорғалса, ал экспорттаушы кепіл тапшы жағдайда қаржы тартуға мүмкіндік береді;
• Экспорттық аккредитивтерді сақтандыру – қазақстандық өнімдер мен қызметтерді сатып алатын импорттаушыларға тиімді шарттармен қаржы шарттарын ұсынады.

Осылайша, ЭКА қолдауы арқылы қазақстандық өндіруші компаниялардың сыртқы нарықтағы саудасы едәуір артады. Сонымен қатар өндірісті кеңейтіп, жаңғыртуға, өнімді қажеттілігі бойынша терең зерттеуге, жаңа технологияларды қолданысқа енгізуге жол ашылады.

Айта кетейік, 2024 жылдың бірінші жартыжылдығында Агенттік отандық экспорттаушыларға 142,1 миллиард теңгеге қолдау көрсетті. Биылғы 6 ай қорытындысы бойынша сақтандыру портфелінің көлемі 476 миллиард теңгеге жетті, жобалардың әлеуметтік-экономикалық тиімділігі 650 миллиард теңге болды.

• 30.09.2024
• 126