ҚАЗАҚ СПОРТШЫЛАРЫНЫҢ ӨТКЕН АПТАДАҒЫ ЖАРҚЫН ЖЕҢІСІ

Үстел теннисі: Сауд Арабиясының Даммам қаласында өткен үстел теннисінен халықаралық турнирде Алан Құрманғалиев қарсылас шақ келтірмей, жеңімпаз атанды.

Сондай-ақ Абдулла Мамай мен Сарвиноз Миркадырова Батумидегі (Грузия) WTT Youth Contender турнирінде жеңіске жетті.

Ауыр атлетика: Испанияның Леон қаласында аяқталған жасөспірімдер арасындағы әлем чемпионатында Қазақстан спортшылары бір алтын, бір қола медаль жеңіп алды. Едіге Емберді (89 кг) 352 келіні еңсеріп, алтыннан алқа тақса, Ерасыл Сәулебеков (81 кг) қола жүлдеге ие болды (344 кг).

Стенд ату: Алматы облысында өтіп жатқан стенд атудан Азия кубогінде Қазақстан құрамасының спортшылары 6 алтын, 3 күміс, 5 қола медаль жеңіп алды. Сары құрлық додасы бүгін аяқталады.

Қазіргі бессайыс: Литвадағы U19 әлем чемпионатында Қазақстан командасының өкілдері – Лев Чувашов пен Данил Богданов қола медаль жеңіп алды.

Каратэ: Қытайдың Ханчжоу қаласында мәресіне жеткен WKF каратэден ересектер арасындағы XX Азия чемпионатында ел спортшылары 2 алтын, 2 күміс және 1 қола медаль олжалады.

Муайтай: Таиланд астанасы Бангкокта ұйымдастырылған муайтайдан жасөспірімдер және жастар арасындағы әлем чемпионатында жерлестеріміз 7 алтын, 7 күміс және 16 қола медаль жеңіп алды.

Теннис: Соня Жиенбаева Мадридте өткен ITF турнирінде жеңімпаз атанды. Отандасымыз финалда британиялық Элис Гилланды (6:1, 5:7, 6:1) жеңді. Бұл – Жиенбаеваның ересектер арасындағы екінші жүлдесі.

Кәсіпқой бокс: Данияр Елеусінов (11-0, 6 КО) Алматыда өткен бокс кешінде филиппиндік Джо Нойнаймен (23-4-2, 11 КО) жұдырықтасып, бесінші раундта техникалық нокаутпен жеңіске жетті.

• 30.09.2024
• 80