Өңірлік кадр резервінің мүшелерімен кездестім

Өңірлік кадр резервінің іріктеуінен өткен жастармен кездестім.  Еркін форматта өткен кездесуде  әрбір жас маманмен жақын танысып, алға қойған жоспарлары, мақсаттары жайлы сұрап білдім.

Жастар кадрлық резерві Президент бастамасымен 2019 жылы құрылған болатын. Нәтижесінде көптеген жастар мемлекеттік қызметке келуіне жол ашылды.
 

Биыл біздің облыс бойынша резерв құрамына кіріп, бақтарын сынау үшін 398 адам ниет білдірді. Соның 25-і барлық кезеңдерден сүрінбей өтіп, өңірлік кадрлық резерв құрамына өтті. Резервте тұрған уақытта сіздер таңдап алған бағыттарыңыз бойынша ұсынылған лауазымдарға конкурс немесе тестілеуден өтпей-ақ бірден орналаса аласыздар. Бұл - үлкен мүмкіндік.

Қазірдің өзінде өңірлік резервте тұрған 25 адамның екеуі басшылық қызметтерге тағайындалды. Олардың бірі облыстық қаржы басқармасы басшысының орынбасары болып бекітілсе, екіншісіне Жарма ауданы әкімі аппаратының қаржы шаруашылық бөлімінің басшысы лауазымы сеніп тапсырылды.

Кездесуде сөз алған жас мамандар мемлекеттік қызметке не үшін барғысы, облысымыздың дамуына қалай үлес қосқысы келетіндіктері туралы ой бөлісті. Бір атап өтерлігі, өңірлік кадр резервіне басқа өңірлерде басшылық қызметттерде еңбек етіп жүрген жастар да қатысып, іріктелген.
 

«Қазіргі таңда Алматы қаласы, Алатау ауданы әкімдігінің аппаратында жұмыс істеймін. Өңірлік кадрлық резерв қатарына енгеніне қуаныштымын. Абай облысы – ата-анамның туған жері. Елге барып қызмет еткім келеді. Соның ішінде экология саласында еңбек етіп, пайдамды тигізсем деймін»,- деді кездесуге «Zoom» желісі арқылы қатысқан Жаудат Жұманов.

Сондай-ақ жастар аймақ басшысына өздерін толғандырған сұрақтарын қойды. Кездесуге қатысқан Мемлекеттік қызмет істері агенттігінің Абай облысы бойынша департаментінің басшысы Нұрлан Дәулетқалиев облыс әкіміне өңірлік кадр резерві жобасын ұйымдастырғаны үшін алғыс білдірді.

• 14.10.2024
• 57