ҚАЗАҚ СПОРТШЫЛАРЫНЫҢ ӨТКЕН АПТАДАҒЫ ЖАРҚЫН ЖЕҢІСІ

Дзюдо: Абу-Дабиде (БАӘ) ұйымдастырылған дзюдодан Үлкен дулыға санатындағы турнирде Қазақстан құрамасының палуандары үш қола медаль жеңіп алды. Атап айтқанда, ерлер арасында Дәурен Сүюкенов (60 кг), әйелдер бәсекесінде Әбиба Әбужақынова (48 кг) мен Назгүл Маратова (+78 кг) үздік үштіктен көрінді.

Академиялық ескек есу: Өзбекстанның Самарқанд қаласында өтіп жатқан Азия чемпионатының алғашқы екі күнінде Қазақстан құрамасының спортшылары 8 медаль (2 күміс, 6 қола) олжалады.
Құзға өрмелеу: Қытайдың Тайань қаласындағы құзға өрмелеуден Азия чемпионатында Әмір Маймұратов пен Тамара Олжабаева күміс медаль еншіледі.

Теннис: Шымкент қаласында өткен жасөспірімдер арасындағы Shymkent Open ITF Juniors турнирінде әлемдік рейтингте 149-орында тұрған Заңғар Нұрланұлы топ жарды. Ол финалда сербиялық Никола Йовичтен (95 ITF Juniors) басым түсті – 7:5, 6:1. Бұл – Заңғардың жекелей сында ITF Juniors додаларындағы төртінші титулы. Бұдан бұрын ол Измирде (J100), Түркияда (J30) және Трнавада (J30) жеңіске жеткен еді.

Теннис: Жұптық сында Қазақстанның бірінші, әлемнің 31-ракеткасы Анна Данилина Ухань (Қытай) WTA 1000 турнирінің чемпионы атанды. Ол ресейлік Ирина Хромачевамен жұп құрап, финалда америкалықтар – Джессика Пегула мен Айша Мухаммадты тізе бүктірді – 6:3, 7:6 (8:6).

Грэпплинг: Астанада грэпплингтен ұйымдастырылған әлем чемпионатында ұлттық құрама 13 жүлдеге (4 алтын, 4 күміс, 5 қола) ие болды.

Каратэ: Италияның Венеция-Езоло қаласындағы WKF каратэден жасөспірімдер мен жастар (U21) арасындағы әлем чемпионатында ұлттық құрама спортшылары 1 алтын, 1 күміс және 2 қола медаль жеңіп алды.

Дзюдо: Ақтаудағы «Халық-арена» спорт кешенінде өткен дзюдодан ашық Азия кубогінде Қазақстан құрамасы 12 алтын, 11 күміс, 21 қола медаль олжалады.

• 14.10.2024
• 72