«Ауылдарға ерекше көңіл бөлінуде»: жұмыс сапарымен Ақсуат ауданына бардым

Ақсуат ауданына жұмыс сапар барысында бірқатар инфрақұрылым нысандарын араладым. Ауданда мәдениет, тұрғын үй-коммуналдық шаруашылық, білім беру және денсаулық сақтау салаларындағы жобалар жүзеге асырылуда. Бұл жұмыстар ауыл тұрғындарының өмір сүру сапасын жақсартуға бағытталған. Осыған орай  бірнеше нысандардың құрылыс барысын тексеріп, аудан әкімдігіне тиісті тапсырмалар бердім.

Алдымен Сәтбаев пен Көктүбек ауылдары арасындағы тас жолының аяқталған құрылысымен таныстым. «Ауыл – Ел бесігі» бағдарламасы аясында екі ауыл арасындағы ұзындығы 9 шақырым учаскеге орташа жөндеу, ал Сәтбаев ауылында ұзындығы 1,4 шақырым болатын жолға орташа жөндеу жұмыстары аяқталды. Мердігер – «СК Зайсан» ЖШС.

Жергілікті қоғамдастық төрағасы Бағлан Қабышев соңғы бір жылдың ішінде Сәтбаев және Көктүбек ауылдарына қомақты қаржылай қолдау көрсетілгенін атап өтті.
 

«Ауылдық жерлерді дамытуға Үкімет тарапынан ерекше көңіл бөлінуде. Мемлекеттік бағдарламалар аясында 1 миллиард теңгеге жуық қаржы бөлініп, ауыларалық және ауылішілік жолдарды жөндеуге, медициналық пункт құрылысын бастауға мүмкіндік туды. Осыған орай, тұрғындар атынан алғысымызды білдіреміз», - деді ол.

Сапар аясында Екпін ауылындағы Мәдениет үйіне бардым. Ғимарат 150 адамға арналған. 10 адам тұрақты жұмыс істейді. Мәдениет үйінде кітапхана, би залы, ақсақалдар кеңесі мүшелеріне, киім ауыстыруға арналған бөлмелер бар.Көрермендерге фильм көрсету мүмкіндігі қарастырылған. Бүгінде Мәдениет үйі ауыл тұрғындарының кездесулері,іс-шаралар өткізілетін маңызды орынға айналды.

• 14.10.2024
• 66