Жұмыстар сапалы жасалуы керек

Көкпекті ауданына барған сапар аясында жоспарланған сондай-ақ құрылысы жүріп жатқан әлеуметтік нысандардағы жұмыстарды тексердім. Соның ішінде тұрғындар үшін маңызы зор денсаулық сақтау, білім беру нысандарына ерекше назар аудардым.

Қазіргі уақытта аудандық ауруханаға «ҚазЖобаСәулет-Консалтинг» ЖШС-мен жасалған келісімшарт негізінде жөндеу жүргізілуде. Бұл жұмыстар науқастар мен медицина қызметкерлеріне қолайлы жағдай жасауға бағытталған.

Дәл осы күні Көкпекті ауданында ауыл шаруашылығы жәрмеңкесі өтуде. Оған 9 ауылдық округ қатысуда. Жәрмеңкені аралап, баға тұрақтылығын қадағалауға тапсырма бердім.

Сонымен қатар,  «Ауылды жерлердегі тірек мектептердің әлеуетін дамыту» бағдарламасы аясында жаңғыртылған Ж.Шайжүнісов атындағы орта мектепте болдым. 2024 жылы «Қазақстан халқына» қоры мектепті күрделі жөндеуден өткізіп, заманауи білім беру технологияларымен жабдықтауға 250 миллион теңге бөлді. Нәтижесінде 22 мамандандырылған оқу кабинеттері, шеберханалар, STEM зертханасы, көркемсурет студиясы, телестудия және оқушыларға арналған коворкинг аймағы бар заманауи кітапхана ашылды.

Көктемгі су тасқынынан зардап шеккен «Жүзағаш» көпірін арнайы барып көрдім. Қазір Тассай ауылына барар жолдағы көпірді салуға жобалық-сметалық құжаттаманы әзірлеуге бюджеттік өтінім берілді. Осы жұмыс жақын арада аяқталады.

Жаңадан тағайындалған аудан әкімі Әділет Қожанбаевқа барлық жобаларды мерзімінде аяқтап, жұмыстың сапасын бақылауды тапсырдым.

• 14.10.2024
• 81