Көкпекті ауданында жол-көлік инфрақұрылымы дамып келеді

Көкпекті ауданы тұрғындары алдында есеп беру кездесу өткізіп, өтпелі кезеңдегі жұмыстарды қорытындыладым. Халықтың көкейкесті сауалдарына жауап бердім.

Есеп беруде жол-көлік инфрақұрылымын дамыту саласына тоқталдым. Мәселен аудандағы Бөгенбай батыр, М.Мақатаев, Бірлік, Мәметек, Ш.Қалдаяқов көшелеріндегі жұмыстарды «Көкпекті жолдары» ЖШС жүргізуде. Бұдан бөлек «Көкпекті-Самар-Васильевская өткелі» KU-14 автожолын орташа жөндеу жұмыстары аясында Үлкенбөкен және Преображенка ауылдарының орталық көшелері жаңартылуда. Преображенка ауылында - 2, Үлкенбөкен ауылында 3 шақырым жолдың жөндеу жұмыстары аяқталды.

Үлгілімалшы ауылының көшесіне 20 жарық бағанасы орнатылып, 0,7 шақырым жарықтандырылды. Сүлеймен ауылында 0,4 шақырымдық учаскені жарықпен қамтамасыз ететін тағы 14 бағана орнатылды. Ақ ой ауылында «Қуатты аймақтар – ел дамуының драйвері» ұлттық жобасы аясында ұзындығы 10 шақырымды құрайтын су желілерін жөндеу жұмыстары аяқталды.

Жалпы, биыл «Ауыл – Ел бесігі» бағдарламасы аясында ауданда 16 бастама жүзеге асырылуда. Оның ішінде ауылішілік жолдарды жөндеу (2 жоба), көше жарықтарын орнату және жаңғырту (11 жоба), аумақтарды абаттандыру бойынша (3 жоба) бар.

Көкпекті ауданында «Ауылдық денсаулық сақтауды жаңғырту» жобасы аясында денсаулық сақтау нысандарын жаңғыртуға ерекше көңіл бөлінді. Үлгілімалшыда отбасылық дәрігерлік амбулатория, Мамай, Қарамойыл, Үшкөмей, Биғаш, Шәріптоғай ауылдарында медициналық пункттердің құрылысы жүріп жатыр.

Ауданда «Арлан» шығармашылық орталығы ашылып, халық биі, домбыра, сурет салу сияқты үйірмелер жұмыс істеп тұр. Орталықта 100-ге жуық адам сурет салуға машықтана алады. Сондай-ақ 220 балаға арналған би залы бар.

Есеп беру аяқталысымен  азаматтарды жеке мәселелерімен қабылдадым. Қабылдауға келгендер денсаулық сақтау, тұрғын үй-коммуналдық шаруашылық, білім беру, жұмыспен және баспанамен қамту сияқты сұрақтарын қойды. Әр тұрғынға жан-жақты жауап қайтарып, аудан әкімдігі мен басқарма басшыларына мәселенің оң шешілуін қадағалауды тапсырдым.

• 14.10.2024
• 68