Павлодар облысында негізгі макро көрсеткіштердің оң динамикасы байқалады

Облыс әкімдігінде әлеуметтік-экономикалық даму, 9 ай ішінде бюджетті игеру қорытындылары шығарылды, сондай-ақ, өңірлік жұмыспен қамту картасын іске асыру мәселелері талқыланды.
 Өңірде 2024 жылдың 3 тоқсанында барлық базалық макро көрсеткіштер бойынша оң динамика байқалды. Өнеркәсіп өнімі 2,5 трлн. теңгеге өндірілді - 103,1%. Өңдеу секторында 8,1% өсімге қол жеткізілді. Ауыл шаруашылығының көлемі 12,7% - 294,1 млрд. теңгеге ұлғайды. Құрылыс жұмыстарының көлемі өткен жылдан 12,8%-ға артық. Өңір экономикасына 708,9 млрд. теңге инвестиция тартылып, өсу қарқыны 127,8% құрады.
 Облыс әкімі Асайын Байханов барлық макро көрсеткіштер бойынша оң динамика тұрақты түрде сақталып тұрғанын атап өтті.
- Жыл соңына дейін 2,5 ай қалды, әкімдер барлық макро көрсеткіштерді орындау үшін барлық ресурстарды жұмылдыруы қажет. Біздің міндетіміз - экономиканың өсу қарқынын барынша сақтау, - деді өңір басшысы.
 2024 жылғы 1 қазанда облыстық бюджеттің кірісі 266 млрд. теңгені құрады. Өткен жылмен салыстырғанда кірістердің өсімі 115,3%.
9 ай ішінде бюджетті игеру бойынша жалпы республикалық рейтингте облыс 2 орында тұр. Жергілікті бюджет қаражаты 100% игерілді.
 Сонымен қатар, жиналыста өңірлік жұмыспен қамту картасын іске асыру қорытындылары қаралды. 9 айдың ішінде облыста 23 мың адам жұмысқа орналастырылды немесе 86,3%.
 «10 мың тұрғынға 100 жұмыс орнын құру» көрсеткішін орындау 84,8% құрайды. Субсидияланатын жұмыс орындарына (жоспар бойынша 6617 адам) 6946 адам жұмысқа орналастырылды (104%). Индикатор облыстың барлық қалалары мен аудандарымен орындалды.
 Асайын Байханов Павлодар мен Ақсу қалаларында бос жұмыс орындарына жұмысқа орналасу көрсеткішінің төмендеуіне, сондай-ақ, білім берудің инфрақұрылымдық жобаларында жұмысқа орналасудың төмен пайызына назар аударды. 2024 жылдың 15 желтоқсанына дейінгі мерзімде «2024 жылға арналған өңірлік жұмыспен қамту картасының» жоспарлы көрсеткіштерінің орындалуын қамтамасыз етуді тапсырды.
Сондай-ақ, жиналыста облыс әкімі 19 қазанда жалпы облыстық сенбілік өткізілетіні туралы хабарлады.
- Облыс тұрғындарын жақсы дәстүрге айналған күзгі сенбілікке қатысуға шақырамын. Ортақ үйімізді қыс мезгіліне дейін бірге тазартайық, - деді өңір басшысы.
 Аудан әкімдеріне аумақтарды жинау мен көгалдандыруды сапалы ұйымдастыру тапсырылды.
 

• 16.10.2024
• 36