Абай облысында орман шаруашылығы қызметкерлеріне құрмет көрсетілді

«Семей Орманы» МОТР-нда Қазақстан Республикасының орман шаруашылығы қызметкерлері күніне арналған салтанатты шара өтті. Кәсіби мерекені тойлауға 10 филиал мен 34-ке жуық орман алқабының қызметкерлері жиналды.

Жиын 2023 жылдың жазында Абай облысында болған ірі өрт салдарынан қаза тапқан орманшыларды бір минут үнсіздікпен еске алумен басталды.

Салтанатты жиында Абай облысы бойынша Орман шаруашылығы және жануарлар дүниесі комитеті басшысының міндетін атқарушы Евгений Сургутанов құттықтау сөз сөйлеп, орманшылардың қызметіне жоғары баға берді.
 

«Құрметті орман шаруашылығы қызметкерлері мен ардагерлері! Сіздердің еңбектеріңіз тек экологиялық емес, экономикалық тұрақтылықты да қамтамасыз етеді. Қиын жағдайларға қарамастан, сіздер орманды қалпына келтіріп, табиғатты қорғаудан талмайсыздар, расымен де құрметке лайықтысыздар. Сіздерге денсаулық, күш-қуат және еңбектеріңізде табыс тілеймін» – деді Евгений Сургутанов.

Ресми бөлімнен кейін Ертіс өңірінің қарағайлы орманын қалпына келтіруге, сондай-ақ болашақ ұрпаққа табиғатты сақтауға қосқан зор үлесі үшін құрмет грамоталары мен алғыс хаттар табыс етілді.

Орман шаруашылығы қызметкерлерінің күні – ормандарды қорғайтын, қалпына келтіру жұмыстарына қатысатын және Қазақстанның экологиялық-ресурстық әлеуетін жақсартуға үлес қосып жүрген мамандарға құрмет көрсетудің көрінісі.

• 30.10.2024
• 22