СҚО ауылдарында жыл сайын 150 км электр желілері ауыстырылады

СҚО әкімі Ғауез Нұрмұхамбетовтың төрағалығымен өткен облыс әкімдігінің отырысында өңірді электр энергиясымен үздіксіз қамтамасыз ету мәселесі қаралды.

Бүгінде облыстағы электр желілерінің ұзындығы 23,5 мың шақырымды құрайды. «СК РЭК» бойынша электр желілерінің тозуы 96%, «Көкшетау Энерго» бойынша 80%.

Қыс мезгілінде электр қуатымен үздіксіз қамтамасыз ету мақсатында екі энергия тасымалдаушы кәсіпорын 1,5 мың шақырымға жуық электр желілері мен 230 қосалқы стансаға күрделі жөндеу және қайта жаңғырту жүргізуде.

Өңірдегі тозу қарқынын азайту үшін электр желілерін жаңғырту бойынша іс-шаралар жоспары әзірленді, оның аясында жыл сайын 150 шақырым желіні ауыстыру арқылы ауылды электрмен жабдықтау жүйесін жаңғырту жоспарлануда. 7 аудандағы 20 ауылды қамтитын 15 жоба әзірленді.

Облыс әкімі Ғауез Нұрмұхамбетов техниканың, жанар-жағармайдың дайындығы мен қолжетімділігі, жедел топтардың дайындығының маңыздылығын атап өтті. Қолайсыз ауа-райы жағдайында төтенше жағдайларды жедел жою үшін жол жүру маршруттары қолжетімді болуы керек.

Аймақ басшысы Петропавл мен аудан әкімдеріне апаттық өшірулерге қатысты жағдайды ерекше бақылауда ұстап, олар орын алған жағдайда дереу шұғыл шаралар қабылдауды тапсырды. Сондай-ақ орталық қазандықтар мен медициналық ұйымдардағы резервтік электр жабдықтарына тексеру жүргізу қажет.

• 01.11.2024
• 24