«Алматы» олимпиадалық даярлау орталығы: Спорттағы халықаралық ынтымақтастықтың жаңа кезеңі

2023 жылдың қараша айында пайдалануға берілген «Алматы» олимпиадалық даярлау орталығы бір жылдың ішінде еліміздегі негізгі спорт кешеніне айналып келеді.

Халықаралық стандарттарға сай орталық ТМД-дағы ең ірі спорт кешені саналады және бір мезгілде 2300 спортшы жаттыға алады.
Орталықта оқу-жаттығу жиындары, емдеу және сауықтыру шаралары, сондай-ақ халықаралық және республикалық жарыстар өткізу үшін 9 жабық спорт ғимараты орналасқан. Мұнда спорттың 23 түрі бойынша олимпиадалық резерв пен ұлттық құрама командалары даярланады.

«Алматы» олимпиадалық даярлау орталығында бір жылдың ішінде бірқатар халықаралық жарыс, оқу-жаттығу жиыны, саммит пен семинарұйымдастырылды.

Атап айтқанда, заманауи инфрақұрылыммен жабдықталған орталықта велоспорттан Азия чемпионаты, гандболдан 19-20 жас аралығындағы балалар арасында IHF Trophy жарысы, жеңіл атлетикадан QOSANOV MEMORIAL Халықаралық жеңіл атлетика турнирі өткізілді. Дүбірлі додаларға 20-дан астам мемлекеттің спортшылары қатысты.

Шетелдік спортшылармен тәжірибе алмасу және кәсіби шеберлікті шыңдау мақсатында спорт нысанында Әзірбайжан (бокс), Қырғызстан (семсерлесу), Гонконг (семсерлесу) және Өзбекстан (футзал) құрамаларымен оқу-жаттығу жиындары өткізілді.

Сондай-ақ отандық спортшылар үшін 12 республикалық жарыс ұйымдастырылып, оған 1820 отандық атлет қатысты. Нысанда спорттық жарыстармен қатар, саммиттер мен семинарлар да өткізіледі. Биылғы сәуір айында орталықта медициналық симпозиум, мамырда ШЫҰ саммиті, қыркүйекте садақ атудан төрешілерге арналған семинар өтті.

• 05.11.2024
• 22