Республика күні қарсаңында Шарбақты ауданында жаңа үйлердің кілттері табысталып, хоккей корты ашылды.

Облыс әкімі Асайын Байханов жұмыс сапарымен Шарбақты ауданына барды. Ең алдымен аймақ басшысы орташа жөндеуден өткен Шарбақты-Солтүстік-облыс шекарасы автожолын тексерді. Мұнда жол жұмыстары тамыз айында басталып, 24,8 км жол төсемі жаңартылды.
 
Одан кейін облыс әкімі Шарбақты ауылының Энергетиктер көшесінде салынған екі пәтерлі 3 үйдің кілттерін табыстау рәсіміне қатысты. Бұл үйлерді жеке тұлға салып, 6 көпбалалы отбасы үшін облыстық бюджет қаражаты есебінен сатып алынды.
 
Асайын Байханов жаңа қоныс иелерін көптен күткен баспаналарымен және келе жатқан ұлттық мереке - Республика күнімен құттықтады.
- Азаматтарымызды қолжетімді баспанамен қамтамасыз ету - мемлекеттің басты мақсаттарының бірі. Биылғы жылы «бизнес пен мемлекеттің» өзара іс-әрекеті аясында біз кезекте тұрған жандар үшін 800 пәтер, соның ішінде облыстың 10 ауданында 313 пәтер сатып аламыз. Пәтерлерді сатып алу тәжірибесін келесі жылдары да жалғастырамыз, - деді облыс әкімі.
 
Ауданы 79,5 м2 үш бөлмелі пәтерлер заманауи технологиялар бойынша салынып, инженерлік коммуникациялармен жабдықталған.
Мерекелік шараға ауданның қоғамдық кеңесі, ардагерлер, ауыл тұрғындары қатысты.
 
Сондай-ақ, бүгін салтанатты түрде жалпы ауданы 1 680 шаршы метрді, мұз аренасы 1 440 м2 құрайтын жаңа жабық хоккей корты ашылды. Спорт нысаны ауыл тұрғындарының өтініші бойынша аудан тұрғыны, кәсіпкер, облыстық мәслихат депутаты Виталий Соломкиннің қолдауымен бой көтерді.
 
Өңір басшысы ауданның дамуына қосқан елеулі үлесі үшін меценатқа алғысын білдірді.
- Өңіріміздегі ауыл тұрғындарының әл-ауқатын жақсартуға бағытталған осындай маңызды жобалардың іске асырылып жатқанына қуаныштымын. Мұндай бастамаларға әлеуметтік жауапкершілігі жоғары және белсенді азаматтық ұстанымы бар бизнестегі азаматтардың мұрындық болғаны қуантады.
Басқа да меценаттар осындай бастамаларды қолдайды деп сенемін, - деді облыс әкімі.

• 11.11.2024
• 82