Павлодар облысының әкімдігінде өңірдің ауыл шаруашылығы тауарын өндірушілерімен меморандумға қол қойылды.

2024-2025 жылдардың қыс-көктем кезеңінде белгіленген бағаны қамтамасыз ету, картоп пен сәбіздің қажетті көлемін сақтау жөніндегі меморандумға облыстың 22 ауыл шаруашылығы өндірушісі қол қойды.

Көкөніс өсірушілер әлеуметтік дүкендерде, фермерлер базарларында және өңірдің апта сайынғы ауылшаруашылық жәрмеңкелерінде картопты 110-120 теңгеден аспайтын бағамен, ал, сәбіздің 1 келісін 90-100 теңгеден аспайтын бағамен  сатуға міндеттеме алды.
Өңір басшысы Асайын Байханов аграршыларға облыс халқының көкөністерге деген қажеттілігін барынша қамтамасыз етіп, картоп пен сәбіз бағасының өсуіне жол бермегендері үшін алғысын білдірді.

- Еңбектеріңіз бен әлеуметтік жауапкершіліктеріңіз үшін рахмет. Сіздер аймағымыздың азық-түлік белдеуін жасап отырсыздар. Жыл сайын бағаның негізсіз өсуін болдырмау мақсатында біз фермерлермен маусымаралық кезеңде сату үшін көкөністердің қажетті көлемін сақтау жөнінде меморандум жасаймыз, - деді облыс әкімі.

Маусымаралық кезеңде облыс нарығын қол жетімді көкөністермен қамтамасыз ету үшін көкөністердің сапасына кепілдік бере отырып, айына 1290 тонна картоп пен 433 тонна сәбіз сату есебімен 10000 тонна картоп және 3000 тонна сәбіз сақталатын болады. Меморандумның қолданылу мерзімі 2024 жылғы 19 қарашадан 2025 жылғы 1 маусымға дейін.

Меморандумға қол қойған барлық өндірушілер жанар-жағармай, тыңайтқыштар, тұқымдар сатып алуға инвестициялық субсидиялау аясында мемлекеттік қолдау алушылар болып табылады.

• 22.11.2024
• 76