Таразда Д.И. Менделеев атындағы РХТУ филиалы ашылды

Химиктердің жаңа буыны М.Х. Дулати атындағы Тараз университетінің базасында ашылған Д.И. Менделеев атындағы Ресей химия-технологиялық университетінің филиалында шыңдалып шығады.
Мемлекет басшысы жоғары білімнің қолжетімділігі туралы қадап айтып, елімізде беделді шетелдік жоғары оқу орындарының филиалдарын ашудың маңыздылығын жеткізген еді.
Тараз қаласында жетекші университет филиалының ашылуы көңілге қуаныш сыйлайды. РХТУ басшылығының Жамбыл жерін таңдауы тегін емес.
Жамбыл – химия өнеркәсібінің отаны! Өндіріс өлкесіндегі ірі зауыттар саланың айнасы әрі бастауы десек қателеспейміз. Шетелдік жоғары оқу орындарымен ынтымақтастық, қос диплом бағдарламасын іске асыру – химия индустриясын одан әрі дамытудағы маңызды қадамның бірі болмақ.
Жаңа оқу жылынан бастап РХТУ филиалында алғашқы топ құрылып, 30 жамбылдық студент «бейорганикалық заттардың химиялық технологиясы» мамандығы бойынша білім алуда.
Филиал ғимаратын күрделі жөндеуге және жабдықтарды жеткізуге «Қазфосфат» ЖШС қаражат бөлді. Жергілікті компанияның білім беру бағдарламасына үлес қосуы студенттердің жұмысқа орналасуының кепілі деп сеніммен айтуға болады.
Өткен жылдың мамыр айында химия өнеркәсібі саласы бойынша ТМД-да тұңғыш жүзеге асырылған желілік кампус жобасы іске қосылды. «2+1+1» бірлескен білім беру бағдарламасы аясында болашақ химик-технологтар алғашқы екі курсты М.Х. Дулати атындағы Тараз университетінде, ал үшінші курсты Д.И. Менделеев атындағы РХТУ-де оқиды. Төртінші курсты Таразда жалғастырып, білім алумен қатар «Қазфосфат» ЖШС-де тәжірибесін шыңдайды.
Ынтымақтастық ықпалын оқушылар да көріп отыр. Өңір мектептерінде жаратылыстану-ғылыми цикл пәндерін тереңдетіп оқыту жүйесін ұйымдастыру үшін Менделеев сыныптары ашылды.
Біздің ұзақ мерзімді іскерлік байланысымыз білім беру бағдарламаларының ауқымын кеңейтуге мүмкіндік беретініне сенімім мол!

• 27.11.2024
• 65