Облыс әкімдігінде тұрғын үй құрылысы, IT жобалар мен өңірдің басым жобаларын іске асыру мәселелері қаралды.

Құрылыс басқармасының басшысы Асқар Ажмұрат 2024 жылы облыс бойынша пайдалануға берілетін тұрғын үйдің жоспарлы ауданы 562,9 мың м2 құрайтынын және бұл өткен жылғы деңгейден 14,0%-ға артық екенін хабарлады.

Жалға берілетін тұрғын үйлер сатып алуға және несиелік тұрғын үйлер салуға 18,6 млрд. теңге бөлінді. 1 желтоқсандағы жағдай бойынша сатып алынуы жоспарланған 804 пәтердің 408-і сатып алынды. Жыл соңына дейін 396 пәтер сатып алу жоспарлануда.

Несиелік тұрғын үй бойынша 14 үйдің құрылысы жүргізілуде. Павлодардың «Достық» шағын ауданында 396 пәтерлі 4 үй салынуда. Жыл соңына дейін «Павлодар» ӘКК желісі бойынша 96 пәтерлі тағы бір несиелік тұрғын үйді тапсыру жоспарлануда. Сондай-ақ, «Павлодар» ӘКК арқылы «Достық» шағын ауданында 1108 пәтерлі 3 көпқабатты тұрғын үй бой көтеруде. Олардың құрылысы 2025 жылы аяқталады.

Екібастұзда бюджет қаражаты есебінен 180 пәтерлі 3 үй салынуда, Ақсуда 216 пәтерлі 2 үйдің құрылысы аяқталды. 2025 жылы Павлодарда 3 және Екібастұзда 3 үйдің құрылысы басталады.

- Адамдар ұзақ уақыт өз баспаналарын күтуде. Өзінің тұрғын үйі болу - бұл азаматтарымыздың әлеуметтік әл-ауқатының ең маңызды факторы. Сіздер қазір мердігер ұйымдарды, құрылысшыларды жұмылдырып, барлық үйлерді аяқтауға міндеттісіздер. Кімде-кім сатып алу рәсімдерін уақытылы жасамайтын болса, әкімдерге тәртіптік сипаттағы шаралар қабылданады, - деді Асайын Байханов.

Өңір басшысы әкімдіктерге, облыстың құрылыс басқармасына: шарттық міндеттемелерге сәйкес 2024 жылға жоспарланған барлық нысандарды пайдалануға беруді қамтамасыз етуді, бюджет қаражатын толық және уақтылы игеру жөнінде шаралар қабылдауды тапсырды.

Жиналыста облыс әкімі өңірді дамытуда цифрландыру мен инновацияларды енгізудің басымдығын атап өтті.

Цифрландыру басқармасының басшысы Ағыбай Әмірин білім және денсаулық сақтау нысандарында «SmartCity Pavlodar» жобасын іске асыру туралы баяндады.

Барлық бейнекамераларды полиция департаментінің жедел басқару орталығына және ахуалдық-талдау орталығына шығару үшін «VMS Sergek» аналитикалық платформасы анықталды. Ол бет-әлпетті, қалдырылған заттарды, түтінді және т. б. тану аналитикасын қолдана отырып, бейнені нақты уақыт режимінде көрсетуге мүмкіндік береді.

«Қауіпсіз қала» жобасы 5 мыңға жуық бейнекамера, оның ішінде 150 қиылыста, республикалық жолдардың 250 желілік және 20 учаскесінде аппараттық-бағдарламалық кешенді (АБК), 3 000 қауіпсіздік бейне бақылау камерасын, төтенше жағдайлар туралы жедел хабарлау «Mass Alert» жүйесін орнатуды көздейді. Сондай-ақ, ескі кабельдерді құрылымдық кабельдік желілерге ауыстыру мектептер мен мекемелердегі интернет жылдамдығын арттырады.

Облыс әкімінің тапсырмасы бойынша Павлодардың адам көп жиналатын 18 қоғамдық орнында, яғни, орталық жағалауда, қалалық саябақта, теміржол және автовокзалдарда, олардың іргелес аумақтарында, орталық скверде, өзен портында, әуежайда, 11 саябақ пен скверде 41 кіру нүктесі болатын Wi-Fi қосу мәселесі пысықталды.

Қыркүйек айында үнемделген қаражат есебінен 5 бірлік жабық сатып алынып, орталық жағалаудағы «Ertis promenade» сахнасының маңында орнатылды (әрбір кіру нүктесіне бір уақытта 250-ге дейін пайдаланушы қосыла алады). Сондай-ақ, «ИнеУ» университеті кітапханасының базасында 700 шаршы метрден астам алаңда IT-хаб ашу мәселесі пысықталуда.

Өңір басшысы келесі жылы іске асырылатын 7 ірі жобаны бақылауға алуды, «Алақан» биометриялық сәйкестендіру жүйесін енгізуді, елді мекендерде «IT-хаб» ашу бойынша жұмысты күшейтуді, ақпараттық технологиялар колледжі үшін халықаралық аккредитация алуды тапсырды.

• 03.12.2024
• 9