Успен ауданында тұрғындармен тұрақты кездесу өтті.

Өңір басшысы Асайын Байханов Тимирязев ауылында тұрғындармен кездесіп, ұсыныс-тілектерін тыңдап, ауыл тұрғындарының сұрақтарына жауап берді.

Облыс әкімі ауданда барлық экономикалық макро көрсеткіштер бойынша оң динамика байқалатынын атап өтті. Ауыл шаруашылығында жақсы нәтижелерге қол жеткізілді. Салаға 4,8 млрд. теңге инвестиция тартылды, аудан өсімдік шаруашылығы бойынша екінші орында, сондай-ақ, ет өндіру мен дәнді дақылдарды жинау бойынша да үздік үштіктің қатарында.

Ауылдық елді мекендерді таза ауыз сумен қамтамасыз ету көрсеткіші 97% құрайды. 2024 жылы Қаратай және Вознесенка ауылдарында су құбырының құрылысы аяқталды. Успен ауданының тұрғындарын 100% таза ауыз сумен қамтамасыз ету үшін келесі жылы Ольховка, Надаровка, Травянка және Дмитриевка ауылдарында кешенді су тазарту қондырғыларын орнату жоспарлануда.

Аудан жолдардың нормативтік жағдайы бойынша да көшбасшылардың бірі. Биыл аудандық маңызы бар 36 км 13 жол жөнделді.

Ауыл тұрғындарының өтініштерін ескере отырып, келесі жылы Ковалевка, Қызылағаш, Қозыкеткен, Таволжан ауылдарының ауылішілік жолдарын, сондай-ақ, Қаратай ауылының ауылішілік көшелерін орташа жөндеу жоспарланған.

Ауданда тағы 7 шақырымға жуық кірме жолдар мен 114 шақырым ауылдық елді мекендердің көшелерін жөндеу қажет.

«Ауыл - ел бесігі» бағдарламасы бойынша Қоңырөзек ауылының Павлов мектебіне, 5,3 км алты ауылішілік жолға күрделі жөндеу жүргізілді. Келесі жылы Ковалевка және Қаратай ауылдары қамтылып, Ковалевка орта мектебі мен 4,5 км ауылішілік жолдарға күрделі жөндеу жүргізіледі.

Ауданда әлеуметтік сала да қарқынды дамып келеді. Биыл денсаулық сақтау саласын жаңғырту бағдарламасы бойынша салынып жатқан 30 ауылдық медициналық мекеменің 5-і Успен ауданында бой көтеруде.

Бүгін Тимирязев ауылында жаңа медициналық пункт ашылды, жыл соңына дейін Қаратай, Ковалевка, Қозыкеткен, Қызылағаш ауылдарында осындай медициналық мекемелердің құрылысы аяқталады.

Жыл соңына дейін Успен ауылында жаңа дене шынықтыру-сауықтыру кешені ашылып, келесі жылы бассейннің құрылысы басталады.

Халықтың әлеуметтік осал топтарын тұрғын үймен қамтамасыз ету үшін биыл облыстық бюджеттен 15 пәтер сатып алуға қаражат бөлінді.

Өңір басшысы аудан басшылығына қысқа мерзімде құрылысты аяқтап, кезекте тұрғандарға көптен күткен баспаналарын беруді тапсырды.

• 20.12.2024
• 6