Облыс әкімі Асайын Байханов Железин ауданында болып, ЖАО кезекте тұрған жандарға жаңа пәтерлердің кілттерін табыс етті.

5 жылдан астам кезекте тұрған 24 отбасы жаңа көппәтерлі тұрғын үйден баспана алды.

- Барлық қоныс иелерін құттықтаймын! Жаңа шаңырақтарыңыз сіздерге тек қуаныш, амандық және отбасылық бақыт әкелсін! Баспаналарыңызды ұзақ күттіргеніміз үшін кешірім сұраймын және шыдамдылық танытқандарыңыз үшін алғысымды айтамын.

Мемлекет басшысының қолдауымен соңғы жылдары біздің облыста тұрғын үй құрылысының қарқыны айтарлықтай өсті. Биылғы жылы «бизнес пен мемлекеттің» өзара іс-әрекеті аясында біз кезекте тұрған жандар үшін 800-ден астам пәтер сатып алудамыз, оның ішінде облыстың 10 ауданында 300-ден астам пәтер. Бұл тәжірибе жалғасатын болады, - деді аймақ басшысы.

Одан кейін Асайын Байханов аудан жұртшылығымен кездесіп, тұрғындардың толғандырған мәселелерін талқылап, олардың ұсыныстарын тыңдады.  Облыс әкімі алдағы 2026-2027 жылдарға арналған жұмыстарды жоспарлау үшін 1 жылға дейін созылуы мүмкін жобаларды қазірден бастау қажет екенін атап өтті.

- Өңір тұрғындарының қажеттіліктерін, толғандырған мәселелерін білу үшін мен әрбір ауданға, оның ішінде шалғайда жатқан шағын ауылдарға жылына бірнеше рет баруға тырысамын. Барған кезде міндетті түрде тұрғындармен кездесіп, көтерген мәселелерін жұмысқа аламыз. Бұл облыс тұрғындарымен тікелей байланыста болып қана қоймай, жергілікті әкімдіктердің жұмысын реттеп, олардың қызметін өзекті мәселелерді шешуге бағыттауға мүмкіндік береді, - деді кездесуде Асайын Байханов.

• 24.12.2024
• 117