Павлодарда ел Президентінің атынан жаңа жылдық шырша мерекесі өтті

«Жаңа жыл республика төрінде» атты дәстүрлі Президент шыршасына облысымыздың түкпір-түкпірінен 200-ден астам жетім, ерекше қажеттіліктері бар балалар, аз қамтылған, көп балалы отбасылардан шыққан балалар және оқуда, спортта, шығармашылықта жоғары жетістікке жеткен балалар шақырылды.

Мерекеге қатысушыларды мемлекет басшысы Қасым-Жомарт Тоқаевтың атынан облыс әкімі Асайын Байханов құттықтап, балаларға мықты денсаулық, бақыт және армандарының орындалуын тіледі. 

- Жаңа жыл - қуаныш пен мерекелік көңіл-күй сыйлайтын жарқын мереке. Келер 2025 жыл әрбірің үшін жаңа жетістіктер мен қызықты оқиғаларға толы болатынына сенімдімін. Сендердің жетістіктерің - Қазақстанның өркендеуінің кепілі. 2025 жыл - молшылық пен бақыт жылы болсын. Өз күштеріңе сеніп, қиындықтардан қорықпаңдар, - деді аймақ басшысы.

Іс-шараға қатысушылар үшін халық ертегілері мен мультфильм кейіпкерлерімен жаңа жылдық ғажайыптар мерекесі ұйымдастырылды. Мерекенің жүргізушілері Ертіс пен Баян жас қонақтарды Отанға деген шексіз сүйіспеншіліктің, достық пен бейбітшіліктің символы - алтын тостаған туралы сиқырлы шоу-қойылымға қатыстырды.

Әрбір бала Қазақстан Республикасы Президентінің атынан құттықтау картасын, 150 мың теңге ақшалай сертификат, кітап, ойыншық және тәттіге толы қалталар алды.

Мерекелік қойылым балаларға арналған «тәтті дастарханмен» аяқталды.

• 25.12.2024
• 75