Жамбыл облысында спорт саласының үздіктері марапатталды

Жамбыл облысының әкімі Ербол Қарашөкеев спорт саласындағы жыл үздіктерін марапаттады.

Салтанатты шарада өңір басшысы сөз алып, 2024 жыл жамбылдық спортшылар үшін есте қаларлық және табысты болғанын атап өтті. Ол қасиетті Әулиеата жерінен шыққан спортшылардың есімі төрткүл дүниеге танылғанын мақтанышпен айтты.

Биыл еліміз бойынша Жамбыл облысы «Үздік спорттық өңір» атанды.

Республикалық, халықаралық додаларда өңір спортшылары 1 800-ге жуық медальға ие болды.

885 жамбылдық спортшы Ұлттық құрама сапында өнер көрсетіп, толағай жетістіктерге жетіп жүр. V Дүниежүзілік көшпенділер ойындарына аймақтан 17 спортшы қатысып, 18 медальға ие болды.

Жамбыл облысында 2 353 спорт нысаны бар болса, оның 111-і 2024 жылы бой көтерді. Нәтижесінде спортпен жүйелі түрде шұғылданатын халық саны - 40,2-ден 41,2 пайызға ұлғайды (2023 ж. - 492 мың адам, 2024 ж. - 503,3 мың адам).

Ербол Қарашөкеев мемлекет тарапынан спортшыларға айрықша қамқорлық жасалып отырғанын айта келе, сала үздіктеріне құрмет көрсетті.

Атап айтқанда, Париж Олимпиадасының чемпионы Елдос Сметов, XVII жазғы Паралимпиада ойындарында күміс жүлдегері Нұрдәулет Жұмағали, көкпаршы, V Дүниежүзілік көшпенділер ойындарының жеңімпазы Құрманбек Тұрғанбек, джиу-джитсудан Әлем чемпионатының 6 дүркін жеңімпазы Аяна Иса «Үздік спортшы» атанды.

«Үздік жас спортшы» атағы ҚР чемпионатының жеңімпазы, жастар арасында Азия және Әлем чемпионатының күміс жүлдегері Юсуф Ашраповқа берілді.

«Үздік жаттықтырушы» аталымына Ғалымжан Жылгелдиев, Саттар Бейсембаев, Еркебұлан Әбдіров, Ерлан Сембеков, Ғани Назымбеков, Асылжан Байзақов, Мұхтар Бердімбетов сынды білікті бапкерлер ие болды.

Сондай-ақ үздік бұқаралық спорттық шаралар өткізу орталығы, спорт мекемесі, бөлімі, мектебі, федерация, нұсқаушы, әдіскер, ауыл жаттықтырушысы, мобилограф, жаңалық жаршысы номинациялары бойынша үздіктер анықталды.

Бұдан бөлек, байрақты бәсекелерде топ жарған спортшылар мен олардың жаттықтырушыларына қаржылай сертификат тапсырылды.

Денешынықтыру және спорт басқармасының басшысы Ернар Ибраимов те сөз алып, әріптестеріне түрлі деңгейдегі марапатты табыс етті.

Салтанатты шара барысында рухты әндер шырқалды, домбыраның күмбірлеген күйіне бишілер мың бұрала биледі. Жас спортшылар өнерін ортаға салып, көпшіліктің қошеметіне бөленді. Облыстық спорт ардагерлері кеңесінің төрағасы Тәуірбек Қарауылтегі топ жарған спорт саңлақтарына ақ батасын берді.

Марапаттау рәсімі Ескендір Хасанғалиевтің «Атамекен» әнімен қорытындыланды.

• 30.12.2024
• 68