Ағымдағы жылғы алғашқы жұмыс сапарымды Байзақ және Меркі аудандарынан бастадым

Мемлекет басшысының Жарлығымен биыл «Жұмысшы мамандықтарының жылы» болып жарияланғаны белгілі.

Осыған орай жұмыс сапарымның барысында бірқатар қарапайым жұмысшы мамандық иелерінің отбасыларына барып, Жаңа жыл мерекесімен құттықтадым.

Байзақ ауданының тұрғындары, ерлі-зайыпты Әкімжан ағамыз бен Шолпан жеңгеміз екеуі де «Байзақ Су» КМК-де оператор болып жемісті қызмет атқаруда. 5 ұл-қызды тәрбиелеп өсірген қарапайым отбасы адал еңбектің берекесіне бөленуде.

Сол секілді Меркі ауданы Сарымолдаев ауылының тұрғыны Құсанбек Сақбаев атамыз бүгінде бейнеттің зейнетін көрер жаста. Ол әр жылдары жүргізуші, шопан, бақташы болып еңбек етті. Кезінде қой қырқудан ел чемпионы атанған атамыз жас ұрпақ үшін нағыз еңбек адамының үлгісіндей десек қателеспейміз.

Бұдан бөлек, Тараз қаласының тұрғындары «Жасыл Ел-Тараз» ЖШС-нің жұмысшысы Ерболат Ошақбай мен «Жамбыл Су» МКК-де электромонтер болып еңбек ететін Руслан Есеевті де мерекемен құттықтадым. Еңбек өтілдері 20 жылдан асатын олар облыс орталығының коммуналдық қызметіне барынша атсалысып, тұрғындар игілігі үшін аянбай еңбек етуде.

Жалпы, талмай жұмыс істеп, көпке үлгі болып, өз ісінің маманы атанып жүрген еңбек адамдары – қандай құрметке де лайық!

Президентіміз атап өткендей, жұмыстың жаманы жоқ, кез келген еңбек – қадірлі. Арамызда еңбектің ерен үлгісін көрсетіп, ұл-қыздарыңа жақсы тәрбие беріп жүрген жандарды біз жас ұрпаққа өнеге етіп, бағалауға тиіспіз!

• 05.01.2025
• 84